རྟ་ཡི་རྒྱན་ཆས་དང་འབྲི་མོའི་བཞོ་ཐག་འུར་རྡོ།
སྤེལ་དུས 2021-02-02
ཡོང་ཁུངས། ཁམས་པའི་དྲ་བ།
རྩོམ་པ་པོ། པདྨ་ནོར་བུ།
རྟའི་རྒྱན་ཆས་རིགས་ལ་རྟ་སྒ། རྟ་སྲབ། རྟ་སྟན། རྟ་མཐུར། རྟ་མགུལ། དྲིལ་ཆུང་། རྟའི་རྔ་རྔོག་སླས་ཏེ་རྒྱན་ཆས་འདོགས་པ། རྟ་རྒྱུགས་དང་འགྲོས་རྒྱུགས་བྱེད་སྲོལ་ཡོད་པ་ནི་འབྲོག་པ་ཚོའི་གོམས་སྲོལ་བཟང་པོ་ཞིག་ཡིན།
རྟའི་རྒ་ཆས།
རྟའི་རྒ་ཆས་ཟེ་བ་ནི། རྟ་སྒ། རྟ་སྟན། རྟ་སྲབ་བཅས་ཀྱི་བསྡུས་མིང་ཡིན་ལ། རྟ་སྒ་ནི་རྟ་བཞོན་པའི་སྐབས་སུ་རྟའི་རྒྱབ་ཏུ་སྟོད་དགོས་པའི་རྟ་སྒ་དང་རྟ་སྟན་ལ་ཟེར། རྟ་སྒའི་རིགས་ནི་ཤིང་སྒ། རྡོ་སྒ། ཀོ་སྒ། གསེར་སྒ་སོགས་ཅི་རིགས་ཡོད། སྒའི་ལྷུ་ལག་ལ་སྔ་རུ་དང་ཕྱི་རུ་གཉིས། སྒ་འབོལ། རྟ་སྟན། ཡོབ་ཆེན། རྨེད། བློ་ཐག་སོགས་ཀྱིས་གྲུབ། རྟ་སྲབ་ལ་གསེར་སྲབ་དང་། སྲབ་ཁྲ རྒྱུན་སྲབ་སོགས་ཡོད། སྲབ་ཀྱི་ལྷུ་ལག་ནི་སྲབ་མདའ། ཁ་ལྷུ་སོགས་ཀྱིས་གྲུབ་ཡོད།
རྟ་མགུལ་དང་རྟ་མཐུར།
རྟ་མགུལ་དང་རྟ་མཐུར་གྱི་རྒྱུ་ཆ་ནི། ཟོག་གི་རྩིད་པ་དཀར་ནག་དང་ཁ་དོག་མི་གཅིག་པའི་སྟོང་སྐུད་སྣ་ཚོགས་སླས་ནས་ལས་པ་ཞིག་ཡིན་ལ། རྒྱན་ཆས་འདི་དག་རྟའི་མགོ་ལ་བསྐོན་ན་མགོ་རྒྱན་ཡག་པ། སྐེ་ལ་འདོགས་ན་སྐེ་རྒྱན་བྱེད་པ། ལུས་ལ་བཏགས་ན་རྟ་ནད་འགོག་པ་སོགས་ཀྱི་དགེ་མཚན་བགྲང་རྒྱུ་ཡོད་པ་ཞིག་ཡིན།
འུར་རྡོའི་རྒྱུ་ཆ་ནི་ཟོག་གི་རྩིད་པ་དང་། ལུག་གི་བལ་གཉིས་གཙོ་བོར་བྱས་ནས་ལས་ཡོད། འུར་རྡོ་ནི་རྫི་བོས་ཟོག་འཚོ་བྱེད་ཀྱི་ལག་ཆ་གལ་ཆེན་ཞིག་ཡིན། འུར་རྡོ་ལ་ཡ་མཆོག མར་མཆོག འུར་མཐིལ། ཚག་ལྕེ་སོགས་ཡོད། རྫི་བོའི་ངག་རྒྱུན་ལ། འུར་རྡོ་ཁྲ་ཆུང་གཟི་རེད།། གཟི་རོགས་གངས་དཀར་སེམས་རེད།། ཟེ་བ་དང་། འུག་རྡོ་ཁྲ་ཁྲ་བཅུ་གཉིས་ལྷས། ནོར་བརྒྱ་དེད་པའི་སེམས་རྟེན་ཡིན་ཟེར་བ་སོགས་འུར་རྡོ་ལ་བསྟོད་པ་དང་། འུར་རྡོའི་མགུར་གླུ་སོགས་ཀྱང་གང་མང་ཡོད་པ་ཞིག་རེད།
སྟོང་སྐུད་དཀར་ནག་གིས་སླས་པའི་འབྲི་མོའི་བཞོ་ཐག་ཁྲ་བོ།
ཟོག་གི་རྩིད་པ་དང་། ལུག་གི་བལ། སྟོང་སྐུད་དཀར་ནག་གིས་སླས་པའི་མདུད་པ་དགུ་སྒྲིལ་དང་། ཆུ་མྱིག་དགུ་སྒྲིལ་སོགས་ཀྱི་ལག་གདུག་དང་། མཛུབ་དཀྲིས། སྐེ་རྒྱན་སོགས་ཡོད་ལ། བལ་སྐུད་ཀྱིས་སླས་པའི་སྐེ་དཀྲིས་དང་། ལག་ཤུབ་ཀྱི་ཐོག་ཏུ་བཀྲ་ཤིས་རྟགས་བརྒྱད་དང་། རྒྱ་ནག་ལྕགས་རི། ཆུ་དང་བྲག་རི་སོགས་ཀྱི་རི་མོ་ཕབ་ནས་སླས་ཡོད་པ་དེ་དག་མིག་ལ་མཛེས་ཞིང་ལུས་ལ་འཇམ་པ། གནའ་བོའི་མི་རིགས་ཤིག་གི་ཁྱད་ཆོས་མངོན་ཤིང་། དེང་རབས་སྤྱི་ཚོགས་ཤིག་གི་དགོས་མཁོ་སྐོང་ཐུབ་པའི་སྲོལ་རྒྱུན་གྱི་ཅ་དངོས་འདི་དག གནའ་གྲོང་དང་མི་རིགས་རིག་དངོས་བཙོང་སའི་ཚོང་ཁང་དག་ནས་ཉོ་མི་ཐུབ་ལ། དྲྭ་ལམ་དང་བཤམས་སྟོན་ཁང་སོགས་ནས་མཐོང་མི་ཐུབ་པ་ཞིག་ཆགས་འདུག
རྩོམ་སྒྲིག་པ། སྣང་རྡོར།
