ཟླ་མཆོད་དུས་ཆེན་འབྱུང་ཁུངས་དེ་འདྲ་རེད།
སྤེལ་དུས 2021-09-22
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ།
ཟླ་མཆོད་དུས་ཆེན། མིང་གཞན་ལ་སྟོན་དཀྱིལ་དུས་ཆེན་དང་། ཟླ་བ་བརྒྱད་པའི་དུས་ཆེན། སྟོན་གྱི་དུས་ཆེན། ཟླ་བརྒྱད་པའི་ལྷན་འཛོམས་དུས་ཆེན། ཟླ་བར་སྙེགས་པའི་དུས་དང་། ཟླ་བར་རྩེ་བའི་དུས། བུ་མོའི་དུས་ཆེན་ནམ་ལྷན་འཛོམས་དུས་ཆེན་སོགས་མིང་གི་རྣམ་གྲངས་མང་པོ་ཡོད་ལ། དེ་དག་རེ་རེར་ཡང་རིག་གནས་དང་གཏམ་རྒྱུད་ཀྱི་རྒྱབ་ལྗོངས་ཕུན་སུམ་ཚོགས་པོ་རེ་ཡོད།
དུས་ཆེན་འདི་ནི་སྤྱིར་བཏང་སྟོན་ཟླ་བརྒྱད་པའི་ཚེས་བཅོ་ལྔ་ལ་གཏོང་མོད། འོན་ཀྱང་སྟོན་ཟླ་གསུམ་གྱི་དཀྱིལ་ལ་འཁེལ་དགོས་པས་ས་གནས་ཁ་ཤས་སུ་བརྒྱད་པའི་བཅུ་དྲུག་ཉིན་ལ་དུས་ཆེན་དེར་རོལ་བའང་ཡོད། སྟོན་དཀྱིལ་དུས་ཆེན་ནི་ཀྲུང་གོའི་གནའ་སྲོལ་དུས་ཆེན་ཞིག་སྟེ། ད་ལྟ་ཧྭ་ཞ་མི་རིགས་ཀྱི་ཁྱབ་ཁོངས་ཡོངས་དང་། ཕལ་ཆེར་འཛམ་གླིང་གི་ཡུལ་གྲུ་གང་སར་དུས་ཆེན་འདི་རོལ་གྱིན་ཡོད། འོན་ཀྱང་དེ་ནི་ཀྲུང་གོ་བ་དང་ཀྲུང་གོའི་རིག་གནས་ཁྱབ་ཁོངས་ཀྱི་མི་ལས་འཛམ་གླིང་གི་མི་ཡོངས་རྫོགས་ནས་དུས་ཆེན་དེ་གཏོང་སྲོལ་ཡོད་པ་ཞིག་མིན། དུས་ཆེན་འདི་ནི་གནའ་བོའི་ཐང་རྒྱལ་རབས་ཀྱི་དུས་མགོ་ནས་བྱུང་ཞིང་ཐང་རྒྱལ་རབས་དར་བའི་དུས་དང་རིམ་བཞིན་སུང་རྒྱལ་རབས་ལ་སོགས་པའི་དུས་སུ་རྒྱུན་ཆགས་པ་བྱུང་། དེ་ནས་རྨེན་དང་ཆིན་རྒྱལ་རབས་ཀྱི་དུས་སུ་སྟོན་དཀྱིལ་དུས་ཆེན་འདི་ཉིད་ཀྲུང་གོའི་དུས་ཆེན་ཁྱད་པར་བ་དཔྱིད་གསར་དུས་ཆེན་དང་གྲལ་མཉམ་པའི་གོ་གནས་ཐོབ། ད་ལྟ་ཀྲུང་གོའི་བག་ཆགས་ཐེབས་པའི་ཡ་གླིང་དབུས་རྒྱུད་ཀྱི་རྒྱལ་ཁབ་ཁ་ཤས་ཀྱིས་ཀྱང་དུས་ཆེན་འདི་ཉིད་གཏོང་སྲོལ་ཡོད་ལ། རང་རྒྱལ་གྱིས་སྤྱི་ལོ་2008ལོ་ནས་བཟུང་རྒྱལ་ཁབ་ཀྱིས་ཁྲིམས་གཏན་འཁེལ་བའི་སྲོལག་རྒྱུན་གྱི་དུས་ཆེན་ཆེ་གྲས་བཞིའི་གྲས་སུ་བཅུག་པ་དང་། ད་དུང་སྤྱི་ལོ་2006ལོའི་ཟླ་5པའི་ཚེས་20ཉིན་རྒྱལ་སྲིད་སྤྱི་ཁྱབ་ཁང་གིས་དུས་ཆེན་འདི་ཉིད་མངོན་མིན་རིག་གནས་ཀྱི་ཤུལ་བཞག་རྩ་ཆེན་གྲས་སུ་བཞག གནའ་ནས་བཟུང་ཟླ་མཆོད་དུས་ཆེན་ལ་སྟོན་དཀྱིལ་དུས་ཆེན་དང་། ཟླ་འོད་ལ་རོལ་བ། ཟླ་བར་ཕྱག་འཚལ་བ། ཟླ་མཆོད་བག་ལེབ་ཟ་བ། ཀུའེ་ཧྭ་མེ་ཏོག་གམ་མེ་ཏོག་དྲི་ལྡན་ལ་རོལ་ཅིང་མེ་ཏོག་དེས་བསྙལ་བའི་ཆང་འཐུང་བ་སོགས་ཀྱི་སྲོལ་ཡོད་པ་རྣམས་ད་ལྟའི་བར་གྲ་མ་ཆག་གྲུ་མ་ཉམས་པར་དར་ཡོད།
རྗེས་སུ་ཀྲུའུ་ཡོན་ཀྲང་གིས་ཟླ་མཆོད་བག་ལེབ་ནང་དུ་གསང་བརྡ་བཅུག་སྟེ་དམག་མི་རྣམས་ཕན་ཚུན་འདུ་རུབ་ཀྱིས་སོག་པོར་རྒོལ་བའི་གཏམ་རྒྱུད་བྱུང་བས་ད་ལྟ་མི་མང་བོ་ཞིག་གིས་ཟླ་མཆོད་བག་ལེབ་བམ་དུས་ཆེན་དེ་ཡོན་གྱི་དུས་སུ་གསར་དུ་བྱུང་བར་འདོད་པའང་ཡོད་མོད། དེ་ནི་རིག་གནས་ཀྱི་རྒྱབ་ལྗོངས་ཆ་ཚང་ལ་བརྒྱུད་མངའ་མེད་པའི་རང་རྟགས་ཡིན། སྟོན་དཀྱིལ་དུས་ཆེན་ནམ་ཟླ་མཆོད་དུས་ཆེན་ནི་ཟླ་བ་ཉ་གང་ཞིང་ཁྱིམ་མི་ལྷན་དུ་འཛོམས་པའི་དུས་ཆེན་ཞིག་ཡིན་ལ། ཕ་ཡུལ་དང་བྲལ་བ་དག་གིས་ཕ་ཡུལ་དང་གཉེན་ཉེ་མཛའ་མོ་སོགས་དྲན་པའི་དུས་ཚིགས་ཤིག་ཏུའང་ངོས་འཛིན་བྱེད་ཀྱི་ཡོད། དེ་བཞིན་དུ་སྟོན་འབྲས་ལེགས་ཤིང་བཀྲ་ཤིས་པ་དང་། བདེ་སྐྱིད་བསོད་ནམས་ཕུན་སུམ་ཚོགས་པའི་དུས་བཟང་ཞིག་ཀྱང་ཡིན། སྟོན་དཀྱིལ་དུས་ཆེན་དང་ལོ་གསར་དུས་ཆེན། དྭངས་གསལ་དུས་ཆེན། ལྔ་བའི་ཚེས་ལྔའི་དུས་ཆེན་བཅས་ནི་ཀྲུང་གོའི་གྲགས་ཅན་གྱི་སྲོལ་རྒྱུན་དུས་ཆེན་བཞི་རུ་གྲགས་སོ།
རྩོམ་སྒྲིག་པ། སྣང་རྡོར།
