ཉེ་ཆར་ལྷོ་ཁ་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་ལ་མི་ཞིག་གིས་སྐད་འཕྲིན་ཚོགས་པར་ཁ་ལོ་བའི་ལག་ཁྱེར་ཚབ་གཉེར་བྱེད་པའི་ཆ་འཕྲིན་སྐུར་གྱི་འདུག་ཅེས་པའི་ཐེར་འདོན་འབྱོར་བ་རེད།
ཝང་ཆེ་གེ་མོ།
ཁ་ལོ་བའི་སློབ་གྲྭའི་གསོ་སྦྱོང་ཀུང་སིས་ཁ་ལོ་བའི་ལག་ཁྱེར་C1 B1 B2 A1 A2བཅས་ཚབ་གཉེར་བྱེད་ཀྱི་ཡོད། མི་ངོ་མ་རྒྱུགས་གཏོང་བར་འགྲོ་དགོས་མེད་པར་རྒྱུགས་ཚབ་གཏོང་མཁན་གྱིས་ཁ་ལོ་བའི་ལག་ཁྱེར་ལེན་ཐུབ། ཆེད་ལས་རྒྱུགས་ཚབ་གཏོང་འདོད་ན། ང་ཚོའི་སར་མིང་ཐོ་བཀོད་ན་འགྲིག རྒྱུགས་གཏོང་སྐབས་མི་ངོ་མ་རྒྱུགས་གཏོང་སར་འགྲོ་དགོས་མེད། ཁ་ལོ་བའི་ལག་ཁྱེར་བདེན་པ་གོ་ཆོད་པ་ཡིན་པས་རྒྱལ་ཡོངས་སུ་ཡིག་ཚགས་བཤེར་ཆོག་ལ་རྒྱུགས་གཏོང་བའི་བརྒྱུད་རིམ་ཧྲིལ་པོ་ཡང་དྲ་ཐོག་ནས་བཙལ་ཆོག རྫུན་མ་འདུག་ན་སྐྱིན་ཚབ་ལྡབ་བཅུ་སྤྲོད་རྒྱུ་དང་གོ་མི་ཆོད་ན་དངུལ་ཚང་མ་སློག་གི་ཡིན། 2013ལོ་ནས་ད་བར་ང་ཚོས་མི་མང་པོར་ཁ་ལོ་བའི་ལག་ཁྱེར་ལེན་རོགས་བྱས་ཡོད། ས་ཁུལ་ཁག་གི་བར་འབྲེལ་དང་ཚབ་གཉེར་ཀུང་སིས་མཉམ་ལས་གཉིས་ཁེ་བྱེད་པར་དགའ་བསུ་ཞུ། (རྒྱུགས་གཏོང་བའི་བརྒྱུད་རིམ་ཧྲིལ་པོར་བལྟ་ཆོག)
མི་དམངས་ཉེན་རྟོག་པས་སློབ་གསོ་བརྒྱབ་པ་བརྒྱུད། ཝང་ཆེ་གེ་མོས་ངོས་ལེན་ཞུས་ཤིང་། ཁོ་པས་ལམ་འགྲམ་གྱི་བརྡ་ཆ་ཞིག་ཏུ་ཡོད་པའི་སྐད་འཕྲིན་གྱི་རྩ་གཉིས་ཨང་རྟགས་བཤེར་ནས“ཁ་ལོ་བའི་ལག་ཁྱེར་ཚབ་གཉེར”ཞེས་པའི་དྲ་གྲོགས་དེ་བསྣན་པ་དང་འབྲེལ་ཁོ་པའི་ས་ནས“ཁ་ལོ་བའི་ལག་ཁྱེར་ཚབ་གཉེར”གྱི་ཆ་འཕྲིན་མཐོང་བྱུང་། སྐབས་དེ་དུས་ང་རང་ཁ་ལོ་བའི་ལག་ཁྱེར་གྱི་རིམ་པ་སྤོར་བཞིན་པའི་སྒང་ཡིན་སྟབས། ཆ་འཕྲིན་དེ་ལྟ་བུ་མཐོང་སྐབས་འཕྲལ་མར་ཁ་ལོ་བའི་སློབ་གྲྭའི་སྐད་འཕྲིན་ཚོགས་པར་བརྒྱུད་སྐུར་བྱས་པ་ཡིན། ཆ་འཕྲིན་བསྐུར་རྗེས་ང་བཙལ་ནས་ཁ་ལོ་བའི་ལག་ཁྱེར་གཉེར་མཁན་མ་བྱུང་ཞེས་བཤད།
བརྟག་དཔྱད་བྱས་པ་བརྒྱུད། སྐྱེས་པ་དེས་སྐད་འཕྲིན་ཚོགས་པར་ཁྲིམས་འགལ་གྱི“ཁ་ལོ་བའི་ལག་ཁྱེར་ཚབ་གཉེར”གྱི་བརྡ་ཆ་ཐེངས་གཅིག་བསྐུར་བ་དང་འབྲེལ་ཉོ་ཚོང་བྱས་པའི་ཟིན་ཐོ་མེད་པ་རེད། ཁ་ལོ་བའི་ལག་ཁྱེར་ཉོ་ཚོང་གི་ཁྲིམས་འགལ་བྱེད་སྤྱོད་ལག་བསྟར་བྱས་མེད་པས། མི་དམངས་ཉེན་རྟོག་པས་ཁོ་པར་བསླབ་འདོམས་བྱས་པ་དང་ཐ་ཚིག་བསྒྲགས་པ་རེད།
མཐར་མི་དམངས་ཉེན་རྟོག་པས་སློབ་གསོ་བརྒྱབ་པ་བརྒྱུད། ཝང་ཆེ་གེ་མོས་རང་ཉིད་ཀྱི་ནོར་འཁྲུལ་ལ་ངོས་འཛིན་ཐུབ་ཅིང་། གནད་དོན་གྱི་ཚབས་ཆེན་རང་བཞིན་ཡང་གསལ་པོར་རྟོགས་པ་རེད།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བདེ་འཇགས་དོ་དམ་ཆད་གཅོད་བཅའ་ཁྲིམས》ཀྱི་དོན་ཚན་ང་གཉིས་པར།
གཤམ་གྱི་བྱེད་སྤྱོད་གང་རུང་ཐོན་རིགས་ལ་ཉིན་10ནས་15མན་གྱི་བཀག་ཉར་བྱེད་པ་དང་འབྲེལ་སྒོར་1000མན་གྱི་དངུལ་ཆད་གཅོད་རྒྱུ། ཉེས་ཚབས་ཆུང་རིགས་ལ་ཉིན་5ནས་10མན་གྱི་བཀག་ཉར་བྱེད་པ་དང་འབྲེལ་སྒོར་500མན་གྱི་དངུལ་ཆད་གཅོད་རྒྱུ།
(གཅིག)རྒྱལ་ཁབ་ལས་ཁུངས་དང་། མི་དམངས་ཚོགས་པ། ཁེ་ལས། བྱ་གཞག་ཚན་པའམ་ཡང་ན་རྩ་འཛུགས་གཞན་དག་གི་གཞུང་ཡིག་དང་། ལག་ཁྱེར། ར་སྤྲོད་ཡིག་ཆ། ཐམ་ག་བཅས་རྫུན་མ་བཟོས་པ་དང་བསྒྱུར་ནས་བཟོས་པའམ་ཡང་ན་ཉོ་ཚོང་བྱེད་རིགས།
(གཉིས)རྫུན་མ་བཟོས་པ་དང་བསྒྱུར་ནས་བཟོས་པའི་རྒྱལ་ཁབ་ལས་ཁུངས་དང་། མི་དམངས་ཚོགས་པ། ཁེ་ལས། བྱ་གཞག་ཚན་པའམ་ཡང་ན་རྩ་འཛུགས་གཞན་དག་གི་གཞུང་ཡིག་དང་། ལག་ཁྱེར། ར་སྤྲོད་ཡིག་ཆ་བཅས་ཉོ་ཚོང་དང་བེད་སྤྱོད་བྱེད་རིགས།
(གསུམ)རླངས་འཁོར་གྱི་སྤ་སེ་དང་། གྲུ་གཟིངས་ཀྱི་སྤ་སེ། གནམ་གྲུའི་སྤ་སེ། རིག་རྩལ་འཁྲབ་སྟོན་གྱི་སྤ་སེ། ལུས་རྩལ་འགྲན་བསྡུར་གྱི་སྒོ་འཛིན་ནམ་ཡང་ན་རིན་འབབ་བསྡུ་བའི་སྤ་སེ་དང་དཔང་ཡིག་རྫུན་མ་བཟོས་པ་དང་། བསྒྱུར་ནས་བཟོས་པ། ལོག་ཚོང་བཅས་བྱེད་རིགས།
(བཞི)གྲུ་གཟིངས་ཀྱི་ཨང་རྟགས་རྫུན་མ་བཟོས་པ་དང་བསྒྱུར་ནས་བཟོས་པ་དང་། རྫུན་མ་བཟོས་པ་དང་བསྒྱུར་ནས་བཟོས་པའི་གྲུ་གཟིངས་ཀྱི་ཨང་རྟགས་ཉོ་ཚོང་དང་བེད་སྤྱོད་བྱེད་པའམ། ཡང་ན་གྲུ་གཟིངས་ཀྱི་ཨིན་ཇིའི་ཨང་ཀི་གསུབ་སྒྱུར་བྱས་རིགས།
རྩོམ་སྒྲིག་པ། བདེ་སྒྲོལ།