ཟླ་5ཚེས་27ཉིན། ལྷ་ས་གྲོང་ཁྱེར་སྤྱི་བདེ་ཅུས་སུ་མང་ཚོགས་ཀྱི་ཐེར་འདོན་གོང་ཞུའི་ཁ་པར་འབྱོར་ནས། “མི་སྒེར་གྱི་ཉིང་སྐྱུར་བརྟག་དཔྱད་སྙན་ཞུ་རྫུན་མ་བསྟན་ནས་གྲང་ཕྲེང་དངོས་ཟོག་ལྷ་སར་དབོར་གྱི་འདུག”ཅེས་བརྗོད། སྤྱི་བདེ་ལས་ཁུངས་ཀྱིས་འཕྲལ་དུ་མི་སྒེར་གྱི་ཉིང་སྐྱུར་བརྟག་དཔྱད་སྙན་ཞུ་བསྟན་ནས་གྲང་ཕྲེང་དངོས་ཟོག་དབོར་མཁན་2རྩད་ཆོད་པས། དུས་ཐོག་ཏུ“རིམས་ནད་ཕྱི་ནས་འགོ་བའི”མངོན་མེད་རྐྱེན་ངན་བསལ་བ་རེད།
རག་རྒན་གསེར་བརྫུས་བདེན་པ་ཡིན་ཁུལ་བྱས།
བརྟག་དཔྱད་བྱས་པ་བརྒྱུད། 2021ལོའི་ཟླ་5ཚེས་22ཉིན་གྲང་ཕྲེང་དངོས་ཟོག་དབོར་མཁན་ཁ་ལོ་བ་ཧའོ་ཆེ་གེ་མོ་དང་ཤའོ་ཆེ་གེ་མོས་རྒྱལ་ནང་ནས་ཐོན་སྐྱེད་བྱས་པའི་འཁྱགས་བཏང་བའི་ཕག་ཤ་ཁག་གཅིག་ལྷ་སར(ཁག་འདིའི་འཁྱགས་བཏང་བའི་ཕག་ཤར་ཉིང་སྐྱུར་བརྟག་དཔྱད་བྱས་རྗེས་སྲིབ་གཤིས་ཡིན་པ)དབོར་བ་དང་། ཁ་ལོ་བས་ཉིང་སྐྱུར་བརྟག་དཔྱད་མ་བྱས་པར་ལིའུ་ཆེ་གེ་མོའི་ས་ནས་སྒོར་150སྤྲད་དེ་མི་སྒེར་གྱི་ཉིང་སྐྱུར་བརྟག་དཔྱད་སྙན་ཞུ་རྫུན་མ་ཉོས་ནས་ལྷ་ས་གྲོང་ཁྱེར་དུ་ཡོང་བ་རེད། མི་དེ་གཉིས་ཀྱིས་སྟེས་དབང་གི་བསམ་བློ་བཅངས་ནས་རག་རྒན་གསེར་བརྫུས་ཀྱིས་བརྟག་དཔྱད་ལས་གཡོལ་ཐབས་བྱས་ཏེ། རྒྱལ་ཁབ་ཀྱི་རིམས་ནད་སྔོན་འགོག་དང་ཚོད་འཛིན་གྱི་འབྲེལ་ཡོད་གཏན་འབེབས་རྦད་དེ་སྣང་མེད་དུ་བཏང་ཡོད།
ཁྲིམས་ལས་འགལ་ཚེ་ཉེས་ཆད་མི་ཕོག་ཅི།
ཤའོ་ཆེ་གེ་མོ་དང་ཧའོ་ཆེ་གེ་མོས་རྒྱལ་ཁབ་ལས་ཁུངས་དང་། མི་དམངས་ཚོགས་པ། ཁེ་ལས། བྱ་གཞག་ཚན་པའམ་ཡང་ན་རྩ་འཛུགས་གཞན་དག་གི་གཞུང་ཡིག་དང་། དཔང་རྟགས། ལག་ཁྱེར་ཡིག་ཆ་བཅས་རྫུན་བཟོ་དང་བཟོ་བཅོས་བརྒྱབ་པས། 《བདེ་འཇགས་དོ་དམ་ཆད་གཅོད་བཅའ་ཁྲིམས》ཀྱི་དོན་ཚན་ང་གཉིས་པའི་གཏན་འབེབས་ལྟར། ཁྲིམས་བཞིན་མི་དེ་གཉིས་ལ་སྲིད་འཛིན་བཀག་ཉར་ཉིན་10ཡི་ཆད་པ་བཅད་པ་མ་ཟད། ལིའུ་ཆེ་གེ་མོས་ཉིང་སྐྱུར་བརྟག་དཔྱད་དཔང་ཡིག་རྫུན་མ་བཟོས་པ་ཁོངས་གཏོགས་ཁུལ་གྱི་རིམས་འགོག་གཞུང་དོན་ཁང་དང་སྤྱི་བདེ་ལས་ཁུངས་ལ་བརྡ་ཁྱབ་བཏང་བ་དང་། དེ་དང་དུས་མཚུངས་གནས་ཚུལ་འདི་རིགས་ལ་མདུན་ཕྱོགས་ཀྱི་ཞིབ་བཤེར་ས་ཚིགས་ཀྱིས་དོ་སྣང་བྱེད་དགོས་པའི་བརྡ་ཁྱབ་བཏང་བ་རེད།
རིམས་ནད་འགོག་པ་ཚང་མར་འགན་འཁྲི་ཡོད།
ལྷ་ས་གྲོང་ཁྱེར་སྤྱི་བདེ་ཅུས་རིམས་ནད་གཞུང་དོན་ཁང་གིས་དྲན་སྐུལ་བྱས་དོན། “མི་དང་དངོས་ཟོག་གཉིས་ཀ་ནས་རིམས་ནད་འགོག་པ”དང“རིམས་ནད་ཕྱི་ནས་མི་འགོ་བ”བྱ་རྒྱུ་ནི་བོད་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་རྩ་དོན་གལ་ཆེན་ཞིག་ཡིན་པས། བོད་དུ་ཡོང་མཁན་གྱིས་དངོས་ཡོད་ལྟར་འགྲོ་སྐྱོད་ཨང་རྟགས་དང་བདེ་ཐང་ཨང་རྟགས་སུ་ཆ་འཕྲིན་ཇི་མ་ཇི་བཞིན་འགོད་དགོས་པ་དང་། ལྷག་དོན་དུ་ཉེན་ཁ་ཆེ་འབྲིང་ཁུལ་ནས་ལྷ་སར་ཡོང་མཁན་ཚོས་རིམས་ནད་སྔོན་འགོག་དང་ཚོད་འཛིན་གྱི་གཏན་འབེབས་ལ་དེ་བས་བརྩི་སྲུང་ཞུ་དགོས། དེས་ན། རང་རྟོགས་ངང་ཉིང་སྐྱུར་བརྟག་དཔྱད་བྱས་འབྲས་ཁྱེར་ནས་ལྷ་ས་གྲོང་ཁྱེར་གྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་སྤྱི་ཡོངས་ལ་གཞོགས་འདེགས་བྱེད་དགོས། དེ་དང་དུས་མཚུངས། གལ་ཏེ་རྒྱ་ཆེའི་གྲོང་མི་ཚོས་རིམས་ནད་དང་འབྲེལ་བའི་ཁྲིམས་འགལ་གྱི་བྱ་སྤྱོད་སྤེལ་བའི་ཁུངས་སྣེ་ཤེས་རྟོགས་བྱུང་ཚེ། དུས་ཐོག་ཏུ་སྤྱི་བདེ་ལས་ཁུངས་ལ་ཐེར་འདོན་བྱེད་རོགས། ཉེན་རྟོག་ཕྱོགས་ཀྱིས་ཁྲིམས་བཞིན་འཕྲལ་མར་རྩད་གཅོད་བྱ་རྒྱུ་ཡིན།
རྩོམ་སྒྲིག་པ། བདེ་སྒྲོལ།