“དྲ་སྦྲེལ་+སྨན་བཅོས་བདེ་ཐང”ལས་དོན་གྱི་ཆེད་དོན་ཚོགས་འདུ་འཚོགས་པ།
སྤེལ་དུས 2021-07-09
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ།
ཚེས་6ཉིན་གྱི་ཕྱི་དྲོར། “དྲ་སྦྲེལ་+སྨན་བཅོས་བདེ་ཐང”ལས་དོན་གྱི་ཆེད་དོན་ཚོགས་འདུ་ལྷ་སར་འཚོགས་པ་རེད། ཚོགས་འདུའི་ཐོག་ལྗོངས་འཕྲོད་བསྟེན་བདེ་ཐང་ཨུ་ལྷན་དང་དེ་བཞིན་འབྲེལ་ཡོད་སྡེ་ཚན་ཁག་གི་ལོ་སྟོད་ཀྱི“དྲ་སྦྲེལ་+སྨན་བཅོས་བདེ་ཐང”ལས་དོན་སྤེལ་ཚུལ་གྱི་སྙན་སེང་གསན་པ་དང་འབྲེལ་ཡོད་ལས་དོན་ལ་ཞིབ་འཇུག་གནང་བ་རེད།
ཚོགས་འདུའི་ཐོག་བསྟན་དོན། “དྲ་སྦྲེལ་+སྨན་བཅོས་བདེ་ཐང”འཕེལ་རྒྱས་བཏང་ཚེ་བོད་ཀྱི་དམིགས་བསལ་གྱི་རང་བྱུང་ས་ཁམས་ཁོར་ཡུག་ལས་བརྒལ་ཐུབ་པ་མ་ཟད། ཐོན་ཁུངས་བསྡུ་སྒྲིལ་ནུས་ལྡན་དང་ཐོན་ཁུངས་བཀོད་སྒྲིག་ལེགས་སུ་གཏོང་ཐུབ་པ་དང་། གཞི་རིམ་གྱི་སྨན་དོན་མི་སྣ་དཀོན་པའི་གནད་དོན་ཐག་གཅོད་ཏན་ཏིག་ཐུབ་ནས་གཞི་རིམ་གྱི་སྨན་བཅོས་ཞབས་འདེགས་ཀྱི་ཆུ་ཚད་མཐོ་རུ་ནུས་ལྡན་གཏོང་ཐུབ། སྡེ་ཚན་ཁག་གིས་ཚད་མཐོའི་མཐོང་ཆེན་བྱས་ཏེ་ལས་ཀའི་བསམ་ཕྱོགས་དང་བྱེད་ཐབས་ལེགས་སུ་གཏོང་བ་དང་། མ་གནས་དང་རིན་དོད་རྩིས་ཡག་པོ་རྒྱག་པ། ལས་ཕྱོད་ཆེ་རུ་གཏོང་བ་བཅས་བྱས་ནས་2021ལོའི་སྲིད་གཞུང་གི་ལས་དོན་སྙན་སྒྲོན་ནང་བཏོན་པའི“དྲ་སྦྲེལ་+སྨན་བཅོས་བདེ་ཐང”གི་ཞབས་འདེགས་ཤང་དང་གྲོང་རྡལ་དུ་ཁྱབ་པར་བྱེད་པའི་དམིགས་ཚད་མངོན་འགྱུར་ཡོང་བའི་འགན་ལེན་བྱེད་དགོས། སྤྱི་འདོམས་འཆར་འགོད་བྱེད་པ་དང་། འབྲེལ་གཏུག་མཐུན་སྦྱོར་ལ་སྔར་བས་ཤུགས་སྣོན་རྒྱག་པ། ས་ཁོངས་སྨན་བཅོས་གྲངས་གཞིའི་ཆ་འཕྲིན་མཉམ་སྦྲེལ་མཉམ་མཐུད་མགྱོགས་སུ་གཏོང་བ། རྒྱང་ཁྲིད་སྨན་བཅོས་འཛུགས་སྐྱོང་མགྱོགས་སུ་གཏོང་བ། “དྲ་སྦྲེལ་+སྨན་བཅོས་བདེ་ཐང”ལས་དམངས་ལ་ཕན་པ་འཐོབ་པར་སྐུལ་འདེད་གཏོང་བ། འཕྲོད་བསྟེན་ཁྱབ་ཁོངས་ཀྱི་གྲངས་གཞིའི་བདེ་འཇགས་དང་ནད་པའི་གསང་འགན་ལེན་བཅས་བྱས་ནས“ལོ་ལྔ་ཚན་བཅུ་བཞི་པའི”རིང་ལྗོངས་ཡོངས་ཀྱི“དྲ་སྦྲེལ་+སྨན་བཅོས་བདེ་ཐང”འཛུགས་སྐྱོང་ལ་གྲུབ་འབྲས་གསར་པ་འཐོབ་པའི་འགན་ལེན་བྱེད་དགོས།
རྩོམ་སྒྲིག་པ། བདེ་སྒྲོལ།
