ཕྱི་འབྲེལ་པུས་བསྟན་དོན།འཛམ་གླིང་ཇི་ཙམ་ཡོ་ལང་ཆེ་ནའང་ཀྲུང་ཨུའི་མཉམ་ལས་དེ་ཙམ་གྱིས་བརྟན་པོའི་སྒོ་ནས་མདུན་སྐྱོད་བྱེད་དགོས།
སྤེལ་དུས 2021-03-25
ཡོང་ཁུངས། མི་དམངས་ཉིན་རེའི་ཚགས་པར།
རྩོམ་པ་པོ།
ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཨུ་རུ་སུའི་ཕྱི་འབྲེལ་པུའུ་ཀྲང་ལཱ་ཕུའུ་ལུའོ་ཕུའུ་ཚེས་22ཉིན་ནས་བཟུང་ཀྲུང་གོར་འཚམས་འདྲིར་ཕེབས་པ་དང་། ཕྱི་འབྲེལ་པུའི་མགྲིན་ཚབ་པ་ཧྭ་ཁྲུན་ཡིང་གིས་དེ་ཉིན། འཛམ་གླིང་ཇི་ཙམ་ཡོ་ལང་ཆེ་ནའང་ཀྲུང་ཨུའི་མཉམ་ལས་དེ་ཙམ་གྱིས་བརྟན་པོའི་སྒོ་ནས་མདུན་སྐྱོད་བྱེད་དགོས། ཕྱི་འབྲེལ་པུའུ་ཀྲང་ལཱ་ཕུའུ་ལུའོ་ཕུའུ་ད་ཐེངས་ཀྲུང་གོར་འཚམས་འདྲིར་ཕེབས་པ་དེས་ཀྲུང་གོ་དང་ཨུ་རུ་སུའི་འབྲེལ་བའི་ཆུ་ཚད་མཐོ་བའི་འཕེལ་རྒྱས་ཀྱི་རྣམ་པ་བཟང་པོ་སྔར་བས་སྲ་བརྟན་དུ་བཏང་ནས་ཕྱོགས་གཉིས་པོའི་རྒྱལ་སྤྱིའི་ལས་དོན་ཁྲོད་ཀྱི་འཐབ་ཇུས་མཉམ་ལས་ཟབ་ཏུ་འགྲོ་རྒྱུའི་ཡིད་ཆེས་ཡོད་ཅེས་བརྗོད།
ཉིན་དེའི་གསར་འགོད་པའི་འཆར་ཅན་ཚོགས་འདུའི་ཐོག་གསར་འགོད་པ་ཞིག་གིས། ལཱ་ཕུའུ་ལུའོ་ཕུའུ་ཡིས་ཉེ་ཆར་བཅར་འདྲི་དང་ལེན་བྱེད་སྐབས་ཨ་རི་དང་ནུབ་ཕྱོགས་རྒྱལ་ཁབ་ཀྱིས་རྒྱལ་སྤྱིའི་ལས་དོན་ཁྲོད་བཙན་དབང་སྲིད་ཇུས་ལག་བསྟར་བྱས་ནས། འཛམ་གླིང་སྣ་མང་ཅན་དང་དམངས་གཙོ་ཅན་གྱི་འཕེལ་ཕྱོགས་ལ་འགལ་རྐྱེན་བཟོ་རྩིས་བྱས་ཏེ། རང་ཉིད་ཀྱི་འདུན་པ་དང་རེ་བ་དེ་རྒྱལ་ཁབ་གཞན་ལ་བཙན་འགེལ་བྱེད་ཀྱི་ཡོད། ཀྲུང་གོ་དང་ཨུ་རུ་སུའི་ལས་འགན་ཨང་དང་པོ་ནི་ཆུ་ཚད་མཐོ་བའི་མཉམ་ལས་ལ་ཤུགས་སྣོན་བརྒྱབ་ནས་མཉམ་དུ་འཛམ་གླིང་སྣ་མང་ཅན་གྱི་འཕེལ་རྒྱས་དང་ས་ཁོངས་གཞི་གཅིག་ཅན་གྱི་མཉམ་ལས་ལ་སྐུལ་འདེད་གཏོང་རྒྱུ་དེ་རེད་ཅེས་བརྗོད་ཡོད། ཀྲུང་གོ་ཕྱོགས་ཀྱིས་དེའི་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས།
“ཕྱི་འབྲེལ་པུའུ་ཀྲང་ལཱ་ཕུའུ་ལུའོ་ཕུའུ་ཡི་སྐད་ཆ་དེ་གནད་ལ་འཁེལ་བ་ཞིག་འདུག” ཧྭ་ཁྲུན་ཡིང་གིས་འཛམ་གླིང་ཇི་ཙམ་ཡོ་ལང་ཆེ་ནའང་ཀྲུང་ཨུའི་མཉམ་ལས་དེ་ཙམ་གྱིས་བརྟན་པོའི་སྒོ་ནས་མདུན་སྐྱོད་བྱེད་དགོས། དུས་ཡུན་རིང་པོའི་ནང་ཨ་རི་དང་ནུབ་ཕྱོགས་རྒྱལ་ཁབ་ཀྱིས་རྟག་ཏུ་དམངས་གཙོ་དང་འགྲོ་བ་མིའི་ཐོབ་ཐང་ཟེར་བའི་དར་རྟགས་འཕྱར་ནས་རང་དགར་རྒྱལ་ཁབ་གཞན་གྱི་ནང་སྲིད་ལ་ཐེ་ཇུས་བྱས་ཏེ་འཛམ་གླིང་ལ་རྙོག་དྲ་མང་པོ་བཟོ་བ་དང་ཐ་ན་དེ་དག་ནི་ཟིང་ཆའི་འབྱུང་རྩར་འགྱུར་གྱི་ཡོད། ཀྲུང་གོ་དང་ཨུ་རུ་སུས་ཐོག་མཐའ་བར་གསུམ་དུ་དཔུང་པ་མཉམ་གཤིབ་ཀྱིས་མཉམ་ལས་དམ་ཟབ་བྱས་ནས་འཛམ་གླིང་ཐོག་གི་བཙན་དབང་དང་ཧམ་ཤེད་ལ་ངོ་རྒོལ་མཐའ་གཅིག་ཏུ་བྱེད་པ་དེ་འཛམ་གླིང་ཞི་བདེ་བརྟན་ལྷིང་གི་ཆུ་གཞུང་གི་གཞོམ་མེད་བྲག་རི་ལྟ་བུར་འགྱུར་ཡོད་ཅེས་བརྗོད།
ཧྭ་ཁྲུན་ཡིང་གིས་ཕྱི་འབྲེལ་པུའུ་ཀྲང་ལཱ་ཕུའུ་ལུའོ་ཕུའུ་ཚེས་22ནས་བཟུང་ཀྲུང་གོར་འཚམས་འདྲིར་ཕེབས་པ་དང་། ད་ཐེངས་ཀྱི་འཚམས་འདྲི་འདིས་ཀྲུང་གོ་དང་ཨུ་རུ་སུའི་འབྲེལ་བའི་ཆུ་ཚད་མཐོ་བའི་འཕེལ་རྒྱས་ཀྱི་རྣམ་པ་བཟང་པོ་སྔར་བས་སྲ་བརྟན་དུ་བཏང་ནས་ཕྱོགས་གཉིས་པོའི་རྒྱལ་སྤྱིའི་ལས་དོན་ཁྲོད་ཀྱི་འཐབ་ཇུས་མཉམ་ལས་ཟབ་ཏུ་འགྲོ་རྒྱུའི་ཡིད་ཆེས་ཡོད། ཀྲུང་གོ་ཕྱོགས་ཀྱིས་ཨུ་རུ་སུ་ཕྱོགས་དང་མཉམ་དུ་རྒྱལ་ཁབ་གཉིས་པོའི་གཙོ་བདག་གི་ཐུན་མོང་ངོས་འཛིན་དོན་འཁྱོལ་ཡག་པོ་བྱས་ནས་མཉམ་དུ《ཀྲུང་ཨུ་ཁྱིམ་མཚེས་རྒྱལ་ཁབ་དབར་གྱི་མཛའ་མཐུན་མཉམ་ལས་ཆིངས་ཡིག》ལ་མིང་རྟགས་བཀོད་ནས་ལོ་20འཁོར་བར་རྟེན་འབྲེལ་ཞུ་རྒྱུ་གཙོ་རྐང་དུ་བྱས་ནས་ཆིངས་ཡིག་གི་སྙིང་སྟོབས་དར་སྤེལ་བཏང་སྟེ། ཁྱབ་ཁོངས་དེ་བས་ཆེ་བ་དང་། ས་ཁོངས་དེ་བས་ཡངས་པ། རིམ་པ་དེ་བས་ཟབ་པ་བཅས་ཀྱི་ཐོག་ནས་ཀྲུང་ཨུའི་དུས་རབས་གསར་པའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བར་སྐུལ་འདེད་བཏང་སྟེ། ཐུན་མོང་ཐོག་ཕན་ཚུན་ཡིད་ཆེས་དང་། གཉིས་ཕན་མཉམ་ལས། དམངས་སེམས་གཅིག་མཐུན། དྲང་གཞག་དྲང་བདེན་བཅས་ཀྱི་རྒྱལ་སྤྱིའི་འབྲེལ་བའི་དཔེ་མཚོན་ཞིག་གཏོད་འདོད་ཡོད་ཅེས་བརྗོད་པ་རེད།
རྩོམ་སྒྲིག་པ། སངས་སྐྱབས།
