- གཞས་ཚིག -
སྦྲ་གུར་སྨུག་པོ།
གཞས་ཚིག བློ་བཟང་རིན་ཆེན།
གཞས་གདངས། རྫོགས་ཆེན་བསྟན་འཛིན།
གཞས་པ། ཡར་དུང་།
ཁྱུང་ཆེན་ནམ་མཁའ་ལྡིང་འདྲ།
ང་ཡི་སྦྲ་གུར་སྨུག་པོ་ཡོད།
གདོང་དམར་བོད་ཀྱི་ཕ་ས།
གནའ་བོའི་ལོ་རྒྱུས་འཁྲུངས་ས་རེད།
ཡ་་་སྦྲ་གུར། ཡ་་་སྦྲ་གུར།
ང་ཡི་སྦྲ་གུར་སྨུག་པོ་ཡོད།
མི་ལུས་དལ་འབྱོར་རྙེད་ས།
སྐྱེ་བ་བོད་ལ་ལེན་སོང་།
འདི་འདྲ་བསོད་ནམས་ཆེ་བ།
མི་ཚེ་འདི་ཡི་སྐྱིད་རེད།
གངས་ལ་སེང་ཆེན་འགྱིང་འདྲ།
ང་ཡི་སྦྲ་གུར་སྨུག་པོ་ཡོད།
ཕ་སྐད་གཙང་མ་དར་ས།
གནའ་བོའི་གཏམ་རྒྱུད་འཁྲུངས་ས་རེད།
ཡ་་་སྦྲ་གུར། ཡ་་་སྦྲ་གུར།
ང་ཡི་སྦྲ་གུར་སྨུག་པོ་ཡོད།
ལྟེ་ཁྲག་ས་རུ་འཕོ་ས།
ཤ་རྩ་སྨུག་པོ་རྒྱས་ས།
འདི་འདྲ་དབང་ཐང་ཆེ་བ།
མི་ཚེ་འདི་ཡི་སྐྱིད་རེད།
ཇ་ཆེན་གྲུ་བཞི་བརྩིགས་འདྲ།
ང་ཡི་སྦྲ་གུར་སྨུག་པོ་ཡོད།
གངས་ཅན་རིག་པའི་འབྱུང་གནས།
སྐྱེས་ཆེན་དམ་པ་འཁྲུངས་ས་རེད།
ཡ་་་སྦྲ་གུར། ཡ་་་སྦྲ་གུར།
ང་ཡི་སྦྲ་གུར་སྨུག་པོ་ཡོད།
དཔལ་འབྱོར་མངའ་ཐང་རྒྱས་ས།
བདེ་སྐྱིད་མེ་ཏོག་བཀྲ་ས།
འདི་འདྲ་ལོངས་སྤྱོད་ཆེ་བ།
མི་ཚེ་འདི་ཡི་སྐྱིད་རེད།
རྩོམ་སྒྲིག་པ། སྣང་རྡོར།