རྫོགས་ཆེན་ཞལ་འབག
སྤེལ་དུས 2021-03-01
ཡོང་ཁུངས། ཁམས་པའི་དྲ་བ།
རྩོམ་པ་པོ།
རྫོགས་ཆེན་ཞལ་འབག་ལ་རྫོགས་ལུགས་ཞལ་འབག་ཟེར། ཞལ་འབག་ལ་ལྷ་འབག་དང་། དྲེགས་པ། དྲེགས་པའི་འཁོར་དང་སྲུང་མའི་འབག ཡུལ་ལྷ་དང་གཞི་བདག་གི་འབག གླིང་གེ་སར་དང་དཔལ་ཐུལ། མ་སྲུ་མོ་སྨན་གྱི་འབག རི་དྭགས་དང་གཅན་གཟན་གྱི་འབག་སོགས་རིགས་མི་འདྲ་བའི་འབག་ཁ་ཤས་འདུག དེའི་ནང་དུ་འབག་གསར་བ་དང་། རྙིང་པ། གསེར་འབག་སོགས་རྒྱུ་ཆ་མི་འདྲ་བའི་འབག་ཀྱང་འདུག
དགོན་པའི་ཞལ་འབག་འཅའ་བའི་ལག་ཤེས་དང་། འབག་འཆམ་གྱི་ལུགས་འདི་ཐོག་མར་དུས་རབས་ནམ་ཙམ་ཞིག་ནས་དར་ཡོད་པ་ཁ་ཚོད་ཆོད་པོའི་བཤད་ཐུབ་མཁན་ཞིག་མི་འདུག་ཀྱང་། དུས་རབས་བཅོ་བརྒྱད་པའི་མཇུག་དང་བཅུ་དགུའི་དུས་མགོ་ཡར་མར་ཞིག་ལ། རྫོགས་སྤྲུལ་ལྔ་བ་ཐུབ་བསྟན་ཆོས་ཀྱི་རྡོ་རྗེའི་སྐུ་དུས་སུ། ཕུར་ཆེན་འབག་འཆམ། གླིང་གི་དཔལ་ཐུལ་སུམ་ཅུའི་འཁོར་ཚོགས་དང་། ཕ་ཁུ་རྒན་རབས། མ་སྲུ་མོ་སྨན། གླིང་ལྷ་ཝེར་མ་དང་བཅས་པའི་ཞལ་འབག་བཅས་ཏེ་འབག་འཆམ་གྱི་སྲོལ་གཏོད་པ་ནས། བོད་ཡུལ་གྱི་ས་ཆ་སོ་སོར་གེ་སར་གར་འཆམ་དང་། འབག་འཆམ་གྱི་ལུགས་དེ་དར་ཁྱབ་ཆེན་པོ་སོང་ཡོད་པ་ཞིག་རེད།
རྫོགས་ལུགས་ཞལ་འབག་འདི་ནི་ས་ཆ་གཞན་གྱི་ཞལ་འབག་དང་མི་འདྲ་བའི་མཛེས་རྩལ་དང་། བརྗིད་ཉམས། ཐིག་རྩ་སོགས་ཀྱི་ཁྱད་ཆོས་ཞིག་ཡོད་པ་ནི་ལྟ་བ་པོའི་མིག་ལ་མཛའ་ཞིང་། ཞི་དྲག་གི་ཉམས་འབུར་དུ་དོད་པ། དྲག་པོའི་ཞལ་འབག་མཇལ་ན་སྐྲག་སེམས་སྐྱེ་བ་ཞིག་དང་། ཞི་བའི་ཞལ་འབག་གིས་ཞི་ལྷོད་ཀྱི་འཛུམ་ཆུང་ཞིག་རང་བཞིན་གྱིས་ཁྱེར་འོང་བ་ཞིག་ཡིན། དུས་ཕྱིས་དགོན་ཁག་མང་པོས་རྫོགས་ཆེན་ཞལ་འབག་ལ་དཔེ་ལྟ་བྱས་ནས་བཅས་བཟོ་བྱས་ཡོད་པ་དང་། རྫོགས་ཆེན་གྱི་ལྷ་བཟོ་གདན་ཞུ་བྱས་ནས་རྫོགས་ཆེན་དགོན་པའི་ཞལ་འབག་འདྲ་བཟོ་བྱས་པ་སོགས་ནི་དགོན་པ་ཁག་དང་། མི་སྒེར་གྱི་མཆོད་ཁང་། དེང་དུས་ཀྱི་བཤམས་སྟོན་ཁང་སོགས་སུ་མཇལ་རྒྱུ་ཡོད་པ་མ་ཚད། རྩ་ཆེན་གྱི་རིན་པོ་ཆེ་ཞིག་ལས་ལྷག་པའི་རིན་བྲལ་གྱི་རིག་གནས་འདི་ལ་སྤྱི་སྒེར་གཉིས་དང་། གཞུང་སྲིད་གང་ཡིན་ཡང་རིག་གནས་ལ་རིག་གནས་ཀྱི་རིན་ཐང་ཞིག་སྤྲོད་དགོས་པ་མིན་ནམ།
རྩོམ་སྒྲིག་པ། སྣང་རྡོར།