རྒྱལ་ཁབ་སྐྱོང་བར་ངེས་པར་དུ་མཐའ་མཚམས་སྐྱོང་དགོས་པ་དང་། མཐའ་མཚམས་སྐྱོང་བར་སྔོན་ལ་བོད་བརྟན་ལྷིང་ཡོང་བ་བྱེད་དགོས། “ལོ་ལྔ་ཚན་བཅུ་གསུམ་པའི”ཚུན་དུ། བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག ལྗོངས་ཡོངས་ཀྱི་གོང་འོག་ཚང་མས་མཐུན་སྒྲིལ་དམ་ཟབ་དང་རྒྱུན་མཐུད་འབད་འཐབ་བྱས་པ་བརྒྱུད། ལྗོངས་ཡོངས་སུ་རྒྱུན་མཐུད་ལོ་ལྔའི་རིང་ཆབ་སྲིད་རང་བཞིན་དང་ཚོགས་སྤྱིའི་རང་བཞིན་གྱི་གནད་དོན་དང་གཏུམ་སྤྱོད་དང་འཇིགས་སྐུལ་གྱི་གྱོད་གཞི་ཚབས་ཆེན་གཅིག་ཀྱང་ཐོན་མེད། སྤྱི་ཚོགས་བཅོས་སྐྱོང་ཏན་ཏིག་ནུས་ལྡན་བྱུང་བ་དང་། ཁྲིམས་བཞིན་བོད་སྐྱོང་གི་ཆུ་ཚད་རྒྱུན་མཐུད་མཐོ་རུ་ཕྱིན་པ། མང་ཚོགས་ཀྱི་བདེ་འཇཌ་ཚོར་སེམས་དང་བློ་ཡིད་ཚིམ་ཚད་99%ཡན་ཟིན་ནས་མཐའ་སྐྱོང་བོད་བརྟན་གྱི་ལེའུ་གསར་པ་བརྩམས་ཡོད།
ཁྲིམས་བཞིན་བོད་སྐྱོང་ཆེད་མང་ཚོགས་ཀྱི་རྨང་གཞི་བརྟན་པོ་བཏིང་བ།
“ཁྲིམས་མཐུན་གྱི་ཐབས་ལམ་བརྒྱུད་ནས་ཁེ་དབང་སྲུང་སྐྱོང་བྱས་ཚེ། རང་ཉིད་ཀྱི་ཁེ་ཕན་ཚད་གཞི་ཆེ་ཤོས་ཀྱི་སྒོ་ནས་སྲུང་སྐྱོང་བྱེད་ཐུབ” 2020ལོའི་ལོ་མཇུག་ཏུ། གཞིས་རྩེ་གྲོང་ཁྱེར་བཅའ་ཁྲིམས་རོགས་སྐྱོར་ལྟེ་གནས་སུ། བོད་རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་གཞིས་རྩེ་གྲོང་ཁྱེར་བཅའ་ཁྲིམས་རོགས་སྐྱོར་ལྟེ་གནས་ཀྱི་ཀྲུའུ་རེན་ཝང་ཅིན་ལུང་གིས་ཁ་པར་ཐོག་ནས་གླ་ཆ་འགྱངས་ཆད་བྱས་པའི་ཞིང་པ་ལས་མི་ཞིག་ལ་ངང་རྒྱུད་རིང་པོས་ཁ་ཏ་བསླབ་བྱ་བྱས་པ་དང་འབྲེལ་གྱོད་གཞི་དེ་རྩིས་བླངས་པ་རེད།
2020ལོར། གཞིས་རྩེ་གྲོང་ཁྱེར་བཅའ་ཁྲིམས་རོགས་སྐྱོར་ལྟེ་གནས་ཀྱིས་ཞིང་པ་ལས་མིའི་གླ་ཆ་འགྱངས་ཆད་ཀྱི་གྱོད་གཞི་བརྒྱ་ལྷག་ཙམ་ཐག་གཅོད་བྱས་པ་དང་། དུས་ཐོག་ཏུ་འགལ་ཟླ་དང་རྩོད་གཞི་བསལ་ཏེ། ཞིང་པ་ལས་མི་བློ་བདེའི་ངང་ཁྱིམ་ལ་ལོག་ནས་ལོ་གསར་གཏོང་ཐུབ་པ་བྱས་ཡོད།
ལོ་མང་རིང་། ཝང་ཅིན་ལུང་དང་ཁོང་གི་ལས་རོགས་ཚོས་གཞིས་རྩེ་གྲོང་ཁྱེར་གྱི་ཤང་དང་གྲོང་གསེབ་ཀྱི་འཐབ་ཕྱོགས་དང་པོར་བཅའ་ཁྲིམས་ཀྱི་ཞབས་ཞུའི་ལས་དོན་ཐེངས་མང་སྤེལ་ཏེ། གཞི་རིམ་གྱི་ལས་དོན་པ་འབོར་ཆེན་དང་འདྲ་བར། དམངས་ཡོངས་ཀྱི་ཁྲིམས་སྐྱོང་འདུ་ཤེས་ཟབ་ཏུ་གཏོང་བ་དང་ཁྲིམས་སྐྱོང་འཛུགས་སྐྱོང་གི་རྨང་གཞི་བརྟན་དུ་གཏོང་ཆེད་ནུས་པ་གལ་ཆེན་བཏོན་ཡོད།
མིག་སྔའི་བར། རིམ་རྩིས་བྱས་ན་བོད་རང་ལྗོངས་ཀྱིས་རིགས་ཁག་གི་ཁྲིམས་སྐྱོང་དྲིལ་བསྒྲགས་སློབ་གསོའི་བྱེད་སྒོ་ཐེངས་ཁྲི་14.21དང་ཁྲིམས་སྐྱོང་འཆད་ཁྲིད་ཐེངས་ཁྲི་1.23སྤེལ་བ་དང་། དྲིལ་བསྒྲགས་དཔྱད་གཞི་ཁྲི་1296ལྷག་སྤྲད་པས། རིམ་རྩིས་ལྟར་ན་མང་ཚོགས་མི་ཐེངས་ཁྲི་2841ལ་སློབ་གསོ་ཐེབས་པ་དང་། དྲ་ཐོག་གི་བྱེད་སྒོ་ཁག་ལ་མི་ཐེངས་ཁྲི་1590ཞུགས་ཡོད་པ་རེད།
“ཧྥུང་ཆའོ་ཉམས་མྱོང”ལ་བོད་ཀྱི་ཁྱད་ཆོས་འདུས་པ།
ནག་ཆུ་གྲོང་ཁྱེར་སོག་རྫོང་རྒྱལ་ཆེན་ཤང་ཁོངས་གཏོགས་ཀྱི་གྲོང་ཚོ(གྲོང་ལྷན)14ཡི་མི་འབོར་མང་བ་དང་ཡུལ་མིའི་རིག་གནས་ཆུ་ཚད་ཞན་ཙམ་ཡོད་པས། ཡུལ་མིའི་དབར་འགལ་ཟླ་དང་རྩོད་གཞི་ཅུང་མང་པོ་ཐོན་གྱི་ཡོད། འགལ་ཟླ་དང་རྩོད་གཞི་ནུས་ལྡན་སེལ་ཆེད། 2020ལོའི་ཟླ་དང་པོར་རྒྱལ་ཆེན་ཤང་གི“གྲོང་དཔོན་རྒན་རབས”ཀྱི་འདུམ་འགྲིག་ཁང་གི་སྒོ་བྱང་བཀལ་ནས་དངོས་སུ་བཙུགས་པ་རེད།
“གྲོང་དཔོན་རྒན་རབས”ཀྱི་འདུམ་འགྲིག་ཁང་གི་འགན་འཁུར་བ་བསྟན་འཛིན་གྱིས་གྲོང་ཚོའི“ཨུ་ལྷན་གཉིས”སུ་ལས་ཀ་ལོ་30བྱས་ཡོད། འདུམ་འགྲིག་པ་གཞན་ཞིག་གིས་གྲོང་ཚོའི“ཨུ་ལྷན་གཉིས”སུ་ལས་ཀ་ལོ་20བྱས་ཡོད། ད་དུང་ཁྲིམས་འཛིན་ལས་རོགས་པ་ཞིག་ཀྱང་ཡོད། དེ་ལྟ་བུའི་རྒན་དར་གཞོན་གསུམ་འཛོམས་པའི“གྲོང་དཔོན་རྒན་རབས”ཀྱི་འདུམ་འགྲིག་ཁང་གིས་འགལ་ཟླ་དང་རྩོད་གཞི་འདུམ་འགྲིག་ལས་དོན་ཡག་པོ་སྤེལ་ཐུབ་ཀྱི་ཡོད།
རྒྱལ་ཡོངས་ཀྱི“ཧྥུང་ཆའོ་རྣམ་པའི་སྤྱི་བདེའི་མངགས་གཏོང་ཁང”ཐོག་མ་ཡིན་པའི་ནག་ཆུ་གྲོང་ཁྱེར་ཨ་མདོ་རྫོང་སྤྱི་བདེ་ཅུས་རྩ་རིང་གྲོང་རྡལ་མངགས་གཏོང་ཁང་གིས། མངགས་གཏོང་ཁང་གི་ཏང་ཀྲི་པུའུ་དང་ཉེན་རྟོག་པར་རོགས་པ་བྱེད་མཁན་ཏང་ཀྲི་པུའུ་སྟེ་ཏང་གི་རྩ་འཛུགས་གཉིས་ལ་བརྟེན་ནས། “གཅིག་རེ་གསུམ”གྱི་ཏང་འཛུགས་སྐྱོང་གི་སྤུས་རྟགས་བཏོད་དེ། ཏང་ཡོན་གང་དུ་སླེབས་ཀྱང་ཏང་གི་སྲིད་ཇུས་དེ་གར་སྒྲོག་འགྲེལ་བྱེད་པ་དང་། ཉེན་རྟོག་པར་རོགས་པ་བྱེད་མཁན་ཁྱོན་ཡོངས་ལ་ཁྱབ་པའི་ཉེན་དོན་ལས་ཀའི་བྱ་ཐབས་བཏོད་པ། དུས་དང་རྣམ་པ་ཀུན་ཏུ་མང་ཚོགས་ལ་ཞབས་འདེགས་ཞུས་ནས་འགལ་ཟླ་གོང་རིམ་ལ་རྩིས་སྤྲོད་མི་དགོས་པ་དང་། དུས་བདེའི་སྤྱི་ཚོགས་སུ་གནས་ཚུལ་གཅིག་ཀྱང་མི་ཐོན་པའི་གྲོང་གསེབ་ཀྱི་བདེ་འཇགས་བཅོས་སྐྱོང་གི་རྣམ་པ་ཞིག་བཏོད་ཡོད། འབྲོག་ཁུལ་དང་། སྦྲ་གུར། རྩྭ་ས་བཅས་སུ་བསྐྱོད་པའི“གཤམ་སྐྱོད་གསུམ”གྱི་ཁྲིམས་སྐྱོང་དྲིལ་བསྒྲགས་བྱེད་སྒོ་སྤེལ་བ་དང་། “ཨ་མདོའི་ཉེན་དོན་ཆུང་ཙག”གི་བོད་རྒྱ་སྐད་གཉིས་ཀྱི་བྱ་རིམ་ཆུང་གྲས་ལ་བརྟེན་ནས། མང་ཚོགས་ཀྱི་ཐེམ་ཐོ་བཟོ་བ་དང་འགྲིམ་འགྲུལ་དོ་དམ་སོགས་ཀྱི་ལས་དོན་དྲ་ཐོག་ནས་སྒྲུབ་པ་དང་། ལམ་སེང་སྒྲུབ་པ། ཐེངས་གཅིག་ལ་སྒྲུབ་པ་བཅས་དངོས་གནས་མངོན་འགྱུར་བྱུང་ཡོད།
མིག་སྔའི་བར། ལྗོངས་ཡོངས་སུ་མི་དམངས་འདུམ་འགྲིག་པ་ཁྱོན་46216(ཚང་མ་ཞོར་འགན་འཁུར་མཁན་ཡིན་པ)དང་། དུད་སྦྲེལ་སྤྱི་མི་92666 “དཔུང་ཁག་བཞིའི”ཁོངས་མི་4598བཅས་ཡོད་པ་རེད།
རྩོམ་སྒྲིག་པ། བདེ་སྒྲོལ།
