༄༅། །འཛིན་གྲྭའི་གཤིས་ཀབློ་བཟང་ཐུབ་པའི་བཤ༵ད་སྒྲུབ༵་ཀྱི།།ལེགས་བཤད་སྨྲ་བའི་མགྲིན་པ་ཅན།།གདུལ་བྱ་རྒྱ༵་མཚོ༵་སྐྱོང་མའི་མགོན།།བཤེས་གཉེན་སྨྲ་བའི་ཟླ་བ་རྒྱལ།།བྱིན་རླབས་འོད་དཀར་འཐུང་བའི་ཚོགས།།བགྲང་བྱ་བཞི་བཅུར་སོན་པའི་དུས།།ཕ་བཟང་དྲན་པའི་མཆོད་སྤྲིན་དུ།།སྙིམ་པའི་མེ་ཏོག་གང་བུ་རྩེག།མཁས་པས་གནས་ལྔ་ཁོང་དུ་ཆུད།།བཙུན་པས་འདུལ་འཛིན་གྲགས་པའི་ཟླ།།བཟང་བས་བྱམས་བརྩེ་མ་མ་བཞིན།།ཡོན་ཏན་རྒྱ་མཚོའི་གཏེར་དེ་དྲན།།འཆད་པ་ལེགས་འདོམས་ལྷ་ཡི་རྔ།།རྩོད་པ་ཕྱོགས་གླང་ཆོས་གྲགས་བཞིན།།རྩོམ་པ་དབྱངས་ཅན་ཞུམ་པའི་ངག།མཁས་བའི་ཁྱུ་མཆོག་གང་དེ་དྲན།།
ལུས་ལ་ཡ་ཡོ་མི་འཚམ་མེད།།ངག་ལ་གྱ༷་གྱུའི་འཁྲུལ་བ་བྲལ།།ཡིད་ནས་དུས་གསུ༷མ་བརྗེད་པ་མེད།།འཛིན༷་གྲྭ༷འི་སྤྲོ་ཚོགས་ཁྱོད་ཀྱི་དྲིན།།ཁྱེད་ཀྱི་བདེན་པའི་བྱིན་འཐུང་བའི།།ལུས་སེམས་ལྕགས་སྲོག་བརྙེས་པའི་ཚོགས།།མཛའ་བ་མི་ལྷོད་སྙིང་གི་ཟླ།།མཐུན་སྒྲིལ་ཨ་ལུང་གཅིག་ཏུ་སྒྲིལ།།དང་པོ་ལོག་དཀར་ཞིང་ལ་དགྱེས།།བར་དུ་ཚོན་པོ་ཤ་ལ་རྔམ།།ཐ་མ་དགྱེས་འཛོམ་གར་ལ་སྤྲོ།།གཞན་མེད་འཛིན་གྲྭའི་དགའ་ཕྱོགས་ཡིན།།བསྡད་ན་མི་འདུས་མི་གཅིག་མེད།།སྒྲུབ་ན་མི་འགྲུབ་བྱ་བ་མེད།།བྱ་བརྒྱ་འུར་རྡོ་གཅིག་ཆོད་འདི།།གྱ་གསུམ་དང་པོའི་ཁྱད་ཆོས་ལགས།།
ཆོས་ཁྲིམས་མི་སྲུང་དགེ་སྦྱོང་མེད།།དམངས་སེམས་དཀྲུགས་པའི་གཞུང་ཞབས་མེད།།སློབ་མར་མི་བྱམས་དགེ་རྒན་མེད།།གྱ་གསུམ་དང་པོའི་རང་གཤིས་ལགས།།མཁས་པ་མི་དགྱེས་བརྩམས་ཆོས་མེད།།མང་ཚོགས་མི་དགྱེས་ལས་བྱེད་མེད།།བཟའ་ཟླར་མི་བྱམས་བཟའ་ཚང་མེད།།གྱ་གསུམ་དང་པོའི་རང་ཚུགས་ཡིན།།
དགའ་ན་གླུ་གར་མི་མཁྱེན་མེད།།སྡུག་ན་འཚམ་འདྲིར་མི་ཡོང་མེད།།བཤད་ན་གཞན་སེམས་མི་སྒུལ་མེད།།གྱ་གསུམ་དང་པོའི་དགའ་ཕྱོགས་ཡིན།།ལྟ་བ་བླ་མའི་གསུང་ལ་འཛིན།།སྒོམ་པ་དམངས་ཀྱི་བདེ་སྡུག་སེམས།།སྤྱོད་པ་ཁྲིམས་མཐུན་ལས་ལ་གཞོལ།།གྱ་གསུམ་དང་པོའི་ལག་ལེན་ཡིན།།མཐོ་ལ་མི་རྒྱུགས་རང་ཚུགས་བརྟན།།དམའ་ལ་མི་སྡང་མི་གཤིས་ལེགས།།བར་མར་འདྲིས་པས་ལག་ལྡང་སྦྲེལ།།གྱ་གསུམ་དང་པོའི་གཤིས་ཀ་ལགས།།དེ་ཡང་མཚོ༷་ལྷོ༷འི་མི༷་རིག༷ས་ཀྱི།།དགེ༷་ཐོན༷་རིག་པའི་སློ༷བ་གྲྭ༷་ཞེས།།ཕྱི་ནང་ཤེས་བྱའི་ཁོ་ལག་རྒྱས།།འབྲས་བཟང་དུད་པའི་ཡོངས་འདུས་ལྗོན།།རྒྱ་ཆེན་ཤེས་བྱའི་གནད་གཟིགས་པའི།།རྒྱུ་སྐར་དབུས་སུ་ཟླ་བ་བཞིན།།ལེགས་བཤད་འོད་དཀར་འཇོ་བ་ཅན།།དྲན་དབང་བྱེ་བ་མཁའ་ཡི་རྒྱན།།གང་དེས་ལེགས་པར་བསྐྱངས་པའི་སྡེ།།འཛིན་གྲྭ་བརྒྱ་སྟོང་འཕེལ་ན་ཡང་།།ཨ་སྨྲའི་འབྲས་བཟང་སྨིན་པ་ཅན།།གྱ་གསུམ་དང་པོ་འདི་ཞེས་གྲགས།།
མདོར་ན་ལེགས་ཚོགས་ཇི་སྙེད་ཀུན།།བླ་མའི་དྲིན་དུ་མཐོང་བའི་ཚེ།།ལོ་ངོ་བཞི་བཅུའི་འདུས་འཛོམས་ཀྱི།།དགྱེས་སྟོན་སྤྲོ་དགའི་མེ་ཏོག་བཞད།།འཇམ་དབྱངས་བྱིས་པ་སྐྱོང་བའི་ཕ།།ཆོས༵་རྗེ༵་དོ༵ན་གྲུབ་རིན༵་པོ༵་ཆེ༵འི།།སྒྲུབ་གནས་བྱ༵་རྒྱལ་ཁྱུང༵་གི་གཤོག།ལེགས་པར་བརྐྱངས་འདྲའི་ཐུལ་འོག་ཏུ།།རྨ་ཀླུང་གཡུ་མཚོའི་མཆོད་ཡོན་ཅན།།ཆལ་ཆིལ་རླབས་ཀྱི་ཟློས་གར་གྱིས།།རིགས་བརྒྱའི་མིག་ཟུང་འཕྲོག་པའི་གནས།།
ཀ༷་དག༷་གཞི༷ས་ཀ༷འི་སྐྱེད་ཚལ་གྱི།།རང་སྤྱིལ་རིག་པའི་གུར་ཁང་དུ།།ཀུན་རྟོག་རླུང་རླབས་གཡོས་དང་ལྷན།།དབྱངས་ཅན་སོར་རྩེར་ཁྱུད་པའི་ཟོལ།།མེ་ནཱ་ཀ་ཡི་་གར་འདི་བསྒྱུར།།དགེ་འདིས་བླ་མའི་དྲིན་གཟོ་དང་།།གྲོགས་ཀུན་མཐུན་འགྲིག་མཉམ་སྤྲོ་བཅས།།ཕུན་ཚོགས་ཡར་ཟླའི་དཔལ་ལ་བཞིན།།ལེགས་ཚོགས་འཕེལ་བའི་རྒྱུར་གྱུར་ཅིག།
