གངས་རིའི་བུ་མོ་ཆོས་དབྱིངས་སྐྱིད།
སྤེལ་དུས 2023-10-10
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། གནམ་ལྷ་བཀྲ་ཤིས།
ལེགས་བྱས་ཀྱོ་བ་རྣོན་པོའི་མཐུ། ། ཆོ༵ས་ཉིད་དམིགས་པ་མེད་པའི་དབྱིང༵ས། ། དགའ་སྐྱིད༵་འཛུམ་མདངས་གྲོལ་བའི་མིག། ཡངས་པའི་ས་ཆེན་ཁྱོན་ལ་གཤེགས། ། གསར་ལྷུན་ས་ལེ་སྦྲམ་གྱི་ལྗིད། ། གྱི༵་ལིང་རྟ་མཆོག་འདུར་བའི་ཟོང་། ། རྟག༵ས་མཚན་རྟེན་འབྲེལ་འབུམ་གྱི་དངོས། ། མ༵་བཅོས་སྐྱེས་སུ་ཐོབ་ལ་བསྔགས། ། བེེཊཱུར་ཞུན་མས་གཏམས་པའི་ཡུལ། ། རྩྭ་ལྗང་ཐགས་སུ་གྲུབ་པའི་གདན། ། དྲིལ་ཆུང་རྟེའུའི་གདངས་དང་ལྷན། ། ལང་ཚོའི་མེ་ཏོག་བཞད་ཅེས་གླེང་། ། ཆལ་ཆིལ་རླབས་དང་ཀློག་གི་སྒྲ། འདུར་གོམ་སྐྱི་གསུར་རླུང་གི་ཤུགས། ། ཅང་ཤེས་འཚེར་སྒྲ་ཐེབ་མོའི་སྒྲ། ། ཕན་ཚུན་འགྲན་པའི་ཟོལ་གྱིས་འཚོ། ། སུག་བཞིའི་རྨིག་སྒྲ་མ་ལྷོད་ཅིང་། ། དུས་བཞིར་གཡེལ་བ་མེད་པའི་འདུར། ། མདའ་བཞིའི་གཡང་དུ་བྱོན་པ་མོ། ། སྡེ་བཞིའི་འཕེལ་ཁ་འཛིན་ལ་ཕྱོགས། ། རྐང་ལག་སྒྲོག་གིས་མ་ཁོག་ལ། ། སྲབ་མེད་གངས་སེང་མི་ཕམ་བཞིན། ། ཞུམ་མེད་གཤིས་སུ་གྲུབ་པའི་སྟོབས། ། གོ་ལའི་ཁྱིམ་འདིར་ངང་གིས་འགྱིང་། ། དེ་ཡང་རྔུལ་ནག་རིལ་བུའི་ཕྲེང་། ། མིག་ཆུ་རླབས་རིས་འཕྱོ་བའི་གར། ། མཉམ་བཞེངས་གསེར་གྱི་ཁྲི་འཕང་ཆེར། ། མཆོད་པའི་སྤྲིན་ཕུང་ཐོག་མ་གཏིབས། ། བརྩེ་བའི་སེམས་དང་དུངས་པའི་ཤ། ཟུང་དུ་སྦྱར་བའི་རྟགས་མ་འདིར། ། མིག་ཆུས་སྙིང་གི་ཟབ་སའི་དོང་། ། དྲུས་པ་ཁྱོད་མིན་སུ་ཡིས་རྟོགས། ། བགྲང་བྱ་བཅུ་གཅིག་ཟད་ཀྱང་རུང་། ། འདུར་གོམ་ཡ་ལད་བཙན་པོའི་སྟོབས། ། གཞར་ཡང་མ་ཞུམ་གད་རྒྱངས་ཀྱིས། ། ཡངས་པའི་ས་ཆེན་སྒུལ་ཅེས་གྲགས། ། དར་ཆེན་འགོམས་ཡུག་མི་བྱ་ཞིང་། ། སྨྲ་བརྗོད་ཚད་ལས་མི་འགོངས་པར། ། ཕྱོགས་བཞིར་དང་བས་གུས་ཕྱག་དེས། ། གངས་རིའི་རང་གཤིས་མཚོན་པར་བྱས། ། ལས་བྱས་མ་བྱས་ཆུད་མི་ཟ། ། འཁྲུལ་བྲལ་རྒྱལ་བའི་གསུང་ལ་བཞིན། ། ལེ་བར་སུམ་ཅུའི་འདུར་རྒྱུག་གི། མཐའ་མ་གསེར་གྱི་རྫོང་བ་ཐོབ། ། བརྩེ་བའི་མི་དང་གཅེས་པའི་ཡུལ། ། རི་ཀླུང་ཀུན་ཏུ་འདུས་པའི་ཚོགས། ། ཕྱོགས་ལས་རྒྱལ་བའི་མཚན་མ་ལ། ། དར་ཚོན་མེ་ཏོག་ཆར་ཆེན་ཕབ། ། གངས་རིའི་དཔལ་མོ་དཔའ་བོའི་ཚུལ། ། ངག་རིག་དབྱངས་སུ་གྱེར་བའི་ཟོལ། ། ཐོས་པས་ཀུན་རྟོག་རླུང་དང་ལྷན། ། སྙན་ཚིག་དིང་རུའི་གདངས་འདི་འཆོར། ། ཅེས་པ་འདི་ཡང་ཕ་ཡུལ་གཅིག་པའི་བུ་མོ་ཆོས་དབྱིངས་སྐྱིད་ཀྱིས་སྐབས་བཅུ་དགུ་བའི་ཨེ་ཤ་ཡའི་ལུས་རྩལ་འགྲན་ཚོགས་སུ་ལེ་བར་སུམ་ཅུའི་ཕོ་མོའི་འདུར་རྒྱུག་ཁྲོད་གསེར་གྱི་རྟགས་མ་བཞེས་པ་མ་ཚད། འཛམ་གླིང་ཨོ་རྩལ་འགྲན་ཚོགས་ལས་ཐོབ་པའི་གསེར་གྱི་རྟགས་མའང་གསབ་འབུལ་ཐུབ་པའི་བྱེད་སྒོ་གཟབ་རྒྱས་ངང་སྤེལ་བའི་ཚུལ་ལས་བརྩམས་ཏེ། དཔྱད་བརྗོད་འདྲ་མིན་དུ་མ་ཞིག་དྲ་ལམ་ནས་མཐོང་བའི་རྐྱེན་བྱས། ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་གི་གླིང་གཙོ་གཞོན་པ་ཟུར་བ། རྨོངས་རྒན་གནམ་ལྷ་བཀྲ་ཤིས་ཀྱིས2023ལོའི་སྤྱི་ཟླ10ཚེས10ཉིན་པེ་ཅིན་གྱི་རང་སྤྱིལ་ཉི་འོད་འཁྱིལ་བའི་ལྡིང་ཁང་དུ་འཕྲལ་བར་བྲིས་པ་དགེ་ལེགས་འཕེལ། །
