ཆུ་ཡོས་ལོ་འདིའི་ཕྱི་ནང་འགལ་རྐྱེན་ཀུན། །
བསལ་པའི་ལྷག་མ་ཧ་ལོའི་དུག་རྩྭ་ཙམ། །
ལུས་པ་དགུ་བཟློག་མེ་ཡིས་བསྲེགས་དང་ལྷན། །
བཀྲ་ཤིས་དབྱར་རྔའི་གྲགས་སྙན་ཕྱོགས་སུ་ཁྱབ། །
དེ་ཡང་གཡུ་འབྲུག་ཁ་སྤྲོད་ནོར་བུ་བརྒྱད། །
ཐོགས་པ་དཔྱིད་གསར་བོད་ལོ་ཉིན་གཅིག་ཏུ། །
ཚེས་འདིས་ཕྱི་ནང་ཕུན་ཚོགས་གཡང་གི་དཔལ། །
སྤུངས་པའི་དངོས་གྲུབ་དེ་རིང་ཁྱོད་ལ་འབུལ། །
གཡུ་འབྲུག་ཁ༷་སྤྲོད་ཁ༷་བ་ཅན་དུ་གྲགས། །
མི་རིགས་མཐུ༷ན་སྒྲིལ་མཐུན༷་པ་སྤུན་བཞིར་གྲུབ། །
རྒྱལ་འབངས་བདེ༷་སྐྱིད་བདེ༷་དགའི་འོ་མཚོ་འཕྱུར། །
སྲིད་འབྱོར་རིག༷་གསུམ་རིགས༷་ཅན་ཀུན་གྱིས་སྨོན། །
གཡུ༷་འབྲུག་གཡུ༷་ལོ་བཀོད་འདྲའི་ཞིང་ན་ལྡིར། །
རྒྱལ༵་བརྟན་རྒྱལ༷་དམངས་སྐྱིད་པའི་གནས་སུ་གླེང་། །
ལོ༷་སར་ལོ༷་རེར་ལྷག་པའི་རྟེན་འབྲེལ་དུ། །
གཡང༵་ལོ་གཡང༷་གིས་ཚེས་པའི་ལོ་སར་བཟང་། །
མི་ལ་མཐུན་བཞི་ཚེ་རིང་དྲུག་གི་གཡང་། །
ནོར་ལ་རྟ་མཆོག་གཏེར་བུམ་ནོར་བུའི་གཡང་། །
ཁྱིམ་ལ་རྫས་རྟགས་བརྒྱད་འཛོམ་དཔལ་གྱི་གཡང་། །
གཡང་ལོ་གཡུ་འབྲུག་ལྡིར་བའི་ལོ་སར་བཟང་། །
བཀྲ་ཤིས་རྟ་མཆོག་ནོར་བུའི་བུམ་པ་བཟང་། །
བཀྲ་ཤིས་རྫས་རྟགས་བརྒྱད་ཀྱི་མཚན་མ་ཤར། །
བཀྲ་ཤིས་འདོད་ཡོན་སྣ་ལྔའི་དགེ་མཚན་འབར། །
བཀྲ་ཤིས་གཡུ་འབྲུག་གྲགས་པའི་ལོ་སར་བཟང་། །
ལུས་སྲོག་མི་ཤིགས་རྡོ་རྗེའི་བྲག་རིར་བརྟན། །
ལམ་བདེ་ལས་འགྲུབ་དབྱར་མཚོའི་དཔལ་ལ་སྡེབ། །
ཤེས་རིག་ཚན་རྩལ་ཀླུང་རྟའི་འཕེལ་ཁ་བཞིན། །
ཕུན་ཚོགས་ཡར་ཟླ་འགྲན་པའི་ལོ་སར་བཟང་། །
རྒྱལ་དར་དམངས་ཕན་སྲིད་ཇུས་རྩ་བ་བརྟན། །
མཐུན་འགྲིག་ལས་བརྩོན་འཕེལ་བའི་འདབ་ལག་ཡངས། །
དམིགས་འབེན་འབྲས་བཅུད་སྣུམ་པོའི་ཁོར་ཡུག་ཅན། །
ཕུན་ཚོགས་ཡོངས་འདུས་ལྗོན་བཟང་རྒྱས་གྱུར་ཅིག།
ཅེས་པ་འདི་ཡང་ལོ་སར་ཚེས་གཅིག་ཉིན་གྲོགས་མང་ཞིག་གིས་ལོ་སར་སྐར་ཕྲིན་གྱི་ལམ་ནས་ཡང་ཡང་སྐུལ་བའི་ངོར། གནམ་ལྷ་བཀྲ་ཤིས་ཀྱིས་པེ་ཅིན་དུ་འཕྲལ་མར་བྲིས་པ་དགེའོ། །