དམངས་ཕན་གྱི་གཏམ་བཟང་འདི་སང་ཉིན་ནས་ལག་བསྟར་བྱ་རྒྱུ་རེད།
སྤེལ་དུས 2021-01-29
ཡོང་ཁུངས། སེམས་ཀྱི་ཞིང་ཁམས།
རྩོམ་པ་པོ།
ཟླ་༡ཚེས༢༨ཉིན་གསར་འགོད་པས་རང་སྐྱོང་ལྗོངས་སྨན་བཅོས་འགན་སྲུང་ཅུས་ནས་ཤེས་རྟོགས་བྱུང་གསལ། ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་རྒྱུན་ལྡན་ཅན་དུ་སྒྱུར་བའི་བླང་བྱ་དོན་འཁྱོལ་སྔར་ལས་ལེགས་པར་བྱེད་པ་དང་། མང་ཚོགས་ཀྱི་ཁུར་པོ་སྔར་ལས་ཇེ་ཡང་དུ་གཏོང་ཆེད། བོད་རང་སྐྱོང་ལྗོངས་སྨན་བཅོས་འགན་སྲུང་ཅུས་ཀྱིས་རང་ལྗོངས་ཀྱི་གཞུང་བཙུགས་སྨན་བཅོས་ཚན་པའི་ཏོག་གསར་གློ་ཚད་རིམས་ནད་གི་ཉིང་སྐྱུར་ཞིབ་དཔྱད་ཚད་ལེན་དང་། ཏོག་གསར་གློ་ཚད་རིམས་ནད་འགོག་རྫས་ཀྱི་ཞིབ་དཔྱད་ཚད་ལེན་བྱེད་པའི་རྣམ་གྲངས་རིན་གོང་ལེགས་སྒྲིག་བྱས་ཤིང་། ལེགས་སྒྲིག་བྱས་རྗེས་ལྗོངས་ཡོངས་ཀྱི་རིམ་པ་གསུམ་པའི་གཞུང་བཙུགས་སྨན་བཅོས་ཚན་པའི་ཏོག་གསར་གློ་ཚད་རིམས་ནད་གི་ཉིང་སྐྱུར་ཞིབ་དཔྱད་ཚད་ལེན་གྱི་རིན་གོང་དེ་མི་རེར་སྒོར༢༠༠ནས་སྒོར༨༠བར་བཅགས་པ་དང་། རིམ་པ་གཉིས་པ་དང་དེའི་མན་གྱི་གཞུང་བཙུགས་སྨན་བཅོས་ཚན་པའི་མི་རེར་སྒོར༧༢བར་བཅགས་ཡོད། རིན་གོང་དེའི་ནང་ཞིབ་དཔྱད་ཚད་ལེན་གྱི་ཚོད་ལྟའི་དངོས་རྫས་ཀྱང་ཚུད་ཡོད། ཏོག་གསར་གློ་ཚད་གི་འགོག་གཟུགས་ཀྱི་ཞིབ་དཔྱད་རིན་གོང་དེ་མི་རེར་སྒོར༡༠༠ནས་སྒོར༤༠བར་བཅགས་ཡོད་པ་རེད།
ཤེས་རྟོགས་བྱུང་བར་གཞིགས་ན། ལེགས་སྒྲིག་བྱས་རྗེས་ཀྱི་རིན་གོང་དེ་ཟླ༡ཚེས༢༩ཉིན་ནས་བཟུང་ལག་བསྟར་བྱ་རྒྱུ་ཡིན་པ་དང་། ལྗོངས་ཡོངས་ཀྱི་གཞུང་བཙུགས་སྨན་བཅོས་སྒྲིག་གཞིའི་རྒྱལ་ཁབ་ཀྱིས་སྲིད་འཛིན་གྱི་བྱེད་ཐབས་སྤྱད་ནས་གཏན་འབེབས་བྱས་པའི་རིན་གོང་མཐོ་ཤོས་དེ་ཡིན་ལ། རང་ལྗོངས་ཀྱི་རིམ་ཁག་གཞུང་བཙུགས་སྨན་བཅོས་ཚན་ཁག་ཏུ་སྤྱོད་པར་འཚམ་པོ་ཡོད། གཞུང་བཙུགས་སྨན་བཅོས་ཚན་པ་ཁག་གིས་རིན་གོང་ཚད་གཞི་ལག་བསྟར་ནན་པོ་བྱ་དགོས་པར་མ་ཟད། མངོན་གསལ་དོད་སར་རིན་གོང་རྣམ་གྲངས་ཀྱི་མིང་དང་། རིན་གོང་ཚད་གཞི། རིན་གོང་གི་གཞི་འཛིན་ས། རྣམ་གྲངས་ཀྱི་ནང་དོན་སོགས་ཡོངས་བསྒྲགས་བྱ་དགོས།
རྩོམ་སྒྲིག་པ། བདེ་སྒྲོལ།