ཀྲུང་གོའི་བོད་ལྗོངས་དྲ་བ། > གསོ་རིག > འཕྲོད་བསྟེན་རྒྱུན་ཤེས།

ཁ་རས་གང་འདྲ་ཞིག་རྒྱག་དགོས་པ་དང་དོ་སྣང་གང་བྱེད་དགོས་སམ།

སྤེལ་དུས 2022-09-19 ཡོང་ཁུངས། བོད་ལྗོངས་ཉིན་རེའི་ཚགས་པར་བོད་ཡིག་སྨྱན་སྦྱོར། རྩོམ་པ་པོ།
  གཅིག ང་རང་སྨན་དོན་མི་སྣ་ཞིག་མིན། འོན་ཀྱང་རླུང་འགྲོ་ཡག་པོ་མེད་པ་དང་མི་ཚོགས་སྟུག་སར་ལས་ཀ་བྱེད་ཀྱི་ཡོད་པས་ཁ་རས་གང་ཞིག་བརྒྱབ་ན་ལེགས་སམ།
  ལན་དུ། གལ་ཏེ་ཁྱེད་རང་སྨན་ཁང་དང་། གནམ་ཐང་། མེ་འཁོར་བབས་ཚུགས། ས་འོག་ལྕགས་ལམ། སྤྱི་སྤྱོད་རླངས་འཁོར། གནམ་གྲུ། མེ་འཁོར། སྒོ་རྩིས་ཚོང་ཁང་། ཟ་ཁང་སོགས་བལྟོས་བཅས་ཀྱི་རླུང་འགྲོ་ཡག་པོ་མེད་པ་དང་མི་ཚོགས་སྟུག་སར་ལས་ཀ་བྱེད་པའམ་ཡང་ན་རིམས་ནད་དང་འབྲེལ་བའི་སྲིད་འཛིན་དོ་དམ་དང་། ཉེན་རྟོག་པ། བདེ་སྲུང་བ། མྱུར་སྐྱེལ་བ་སོགས་ཀྱི་ལས་ཀ་བྱེད་མཁན་གང་ཞིག་ཡིན་རུང་། ཚང་མ་རིམས་ནད་འགོ་ཉེན་ཅུང་ཆེ་བའི་མི་སྣའི་ཁོངས་སུ་གཏོགས་པས་ལས་ཀ་བྱ་ཡུལ་དུ་སྨན་ཁང་གི་ཕྱི་བཅོས་ཚན་ཁག་གི་ཁ་རས་རྒྱག་དགོས།
  གཉིས། ས་ཆ་གང་འདྲ་ཞིག་ཏུ་ཁ་རས་མ་བརྒྱབ་ན་ཆོག་གམ།
  ལན་དུ། གལ་ཏེ་ཁྱེད་རང་ལ་རིམས་ནད་འགོས་མེད་པ་མ་ཟད། ཁྱིམ་དུ་སྡོད་པའམ་ཡང་ན་རླུང་འགྲོ་ཡག་པ་དང་མི་ཉུང་སར་ཡོད་ཚེ། རིམས་ནད་འགོ་ཉེན་ཆུང་བའི་མི་སྣའི་ཁོངས་སུ་གཏོགས་པས་ཁ་རས་མ་བརྒྱབ་ན་ཆོག དཔེར་ན། ཁྱིམ་དུ་དོགས་ཡོད་ནད་དཔེ་མེད་པ་དང་། ནད་པ་དང་འབྲེལ་ཐུག་དམ་ཟབ་བྱེད་མྱོང་མེད་པ། དེ་བཞིན་རིམས་ནད་ཁུལ་ནས་སླེབས་པའི་ནང་མི་མེད་པ། སྒེར་འཁོར་དུ་རིམས་ནད་ཁུལ་གྱི་འགྲུལ་པའམ་ཡང་ན་དོགས་ཡོད་ནད་དཔེ་བླུག་མྱོང་མེད་པ། རླུང་འགྲོ་ཡག་པོ་ཡོད་སར་ལས་ཀ་བྱེད་པ། གྲོང་པ་ཁྱིམ་མཚེས་དང་བར་ཐག་འོས་འཚམ་ཡོད་པ། གཞུང་ལས་ཁང་དུ་དུག་སེལ་དང་། ཚ་བ་ལྟ་བ། རླུང་འགྲོ་ཡག་པོ་ཡོད་པ་མ་ཟད། ལས་རོགས་ལའང་རིམས་ནད་འགོས་པའི་དོགས་གཞི་མེད་ཅིང་ནད་པ་དང་འབྲེལ་ཐུག་དམ་ཟབ་བྱེད་མྱོང་མེད་པ་བཅས་ཡིན་ཚེ་ཁ་རས་མ་བརྒྱབ་ན་ཆོག
  གསུམ། བྱིས་པ་ཚོས་ཁ་རས་གང་ཞིག་རྒྱག་དགོས་པ་དང་དོ་སྣང་གང་བྱེད་དགོས་སམ།
  ལན་དུ། རྒྱལ་ཁབ་ཀྱི་ཚད་གཞི་དང་མཐུན་པ་མ་ཟད་བྱིས་པའམ་ཡང་ན་གཞོན་ནུ་ལོ་ཆུང་ལ་དམིགས་ནས་བཟོས་པའི་འགོག་སྲུང་ཁ་རས་སྤྱོད་དགོས། བྱིས་པ་ཚོར་ཁ་རས་མ་བརྒྱབ་གོང་ཁྱིམ་བདག་གིས་ཁ་རས་རྒྱག་སྟངས་བསླབས་ནས་ཡང་དག་སྒོ་ནས་ཁ་རས་རྒྱག་དགོས། གལ་ཏེ་ཕྲུ་གུར་ཁ་རས་བརྒྱབ་རྗེས་མི་བདེ་བ་བྱུང་ཚེ་དུས་ཐོག་ཏུ་ཁ་རས་རྒྱག་སྐྱོར་བྱེད་པའམ་ཡང་ན་རྒྱག་མཚམས་འཇོག་དགོས། ཕྲུ་གུའི་ངོ་གདོང་ཆུང་བས་མི་རྒན་པའི་ཁ་རས་རྒྱག་མི་རུང་།
  བཞི། ཁ་རས་རྒྱག་སྐབས་དོ་སྣང་བྱེད་དགོས་པ་གང་ཡོད་དམ།
  ལན་དུ། ཁ་རས་ཆེ་ཆུང་འཚམ་པོ་ཞིག་འདེམས་དགོས། ཁ་རས་མ་བརྒྱབ་གོང་སྔོན་ལ་ལག་པ་འཁྲུད་དགོས་པ་དང་། ཁ་རས་རྒྱག་སྐབས་ངོ་གདོང་ལ་དམ་པོར་སྦྱོར་བ་དང་ཆབས་ཅིག མཛུབ་མོས་ཁ་རས་ཀྱི་ལྕགས་སྐུད་མནན་ཙམ་བྱས་ནས་མཐའ་འཁོར་གྱི་མཁའ་རླུང་ནང་དུ་མི་འཛུལ་བ་བྱེད་དགོས། སྨན་ཁང་གི་ཕྱི་བཅོས་ཚན་ཁག་གི་ཁ་རས་ཀྱི་ལྕགས་སྐུད་ཁ་རས་ཀྱི་འགོར་ཡོད་པས་ཁ་རས་རྒྱག་སྐབས་དམ་པོར་གནོན་དགོས། གལ་ཏེ་ཁ་རས་ལ་ངེས་པར་དུ་རེག་དགོས་ཚེ་མ་རེག་གོང་དང་རེག་རྗེས་ལག་པ་འཁྲུད་དགོས། ཁ་རས་བཀྲོལ་སྐབས་གང་ཐུབ་ཅི་ཐུབ་ཀྱིས་ཁ་རས་ཀྱི་ངོས་ལ་མ་རེག་པ་བྱེད་དགོས་ལ། འཕྲལ་དུ་ལག་པ་འཁྲུད་དགོས།
  ལྔ། ཁ་རས་ཉིས་བརྩེགས་བརྒྱབ་ན་དེ་བས་བདེ་འཇགས་ཀྱི་ནུས་པ་ཐོན་ནམ།
  ལན་དུ། ཁ་རས་ཉིས་བརྩེགས་བརྒྱབ་ན་བདེ་འཇགས་ཀྱི་རང་བཞིན་ཆེ་རུ་འགྲོ་མི་སྲིད།
  དྲུག བརྒྱབ་ཟིན་པའི་ཁ་རས་ཡང་བསྐྱར་བརྒྱབ་ན་ཆོག་གམ།
  ལན་དུ། རིམས་ནད་འགོ་ཉེན་ཆེ་བ་དང་ཅུང་ཆེ་བའི་མི་སྣ་ཕུད། ན་ཚ་མེད་མཁན་གྱིས་རྒྱག་མྱོང་བའི་ཁ་རས་ཡང་བསྐྱར་རྒྱག་ཆོག་ཅིང་། དེའི་ནང་འོས་འཚམ་ཁ་རས་རྒྱག་པའི་དུས་ཡུན་དང་ཐེངས་གྲངས་མང་དུ་གཏོང་བ་ཚུད་ཡོད། གལ་ཏེ་ཁ་རས་ཡང་བསྐྱར་རྒྱག་དགོས་ཚེ་གཙང་ལ་སྐམ་ཤས་ཆེ་ཞིང་རླུང་འགྲོ་ཡག་སར་འགེལ་བའམ་ཡང་ན་གཙང་ལ་རླུང་འགྲོ་ཡག་པའི་ཤོག་སྣོད་དུ་བླུག་དགོས། ཁ་རས་ལོགས་སུ་བཞག་ནས་ཅ་དངོས་གཞན་པར་མ་རེག་པ་བྱེད་དགོས་པ་མ་ཟད། སོ་སོའི་ཁ་རས་ངོས་འཛིན་ཡག་པོ་བྱེད་དགོས།