མཆིན་པའི་ཐུམ་འབུ་ནད་ནི་ཚེར་ཟླུམ་འབུ་ཕྲུག་མི་ལུས་ནས་འཁྲི་སྐྱེ་བྱས་པ་ལས་བསྐྱེད་པའི་མཆིན་པའི་ནད་ཅིག་ཡིན་ལ། མི་ཕྱུགས་གཉིས་ལ་འབྱུང་བ་དང་། རང་རྒྱལ་གྱི་ནུབ་བྱང་རོང་འབྲོག་ཁུལ་དུ་འབྱུང་ཚད་མཐོ་བ་ཡིན།
བརྟག་དཔྱད།
མཆིན་པའི་ཐུམ་འབུ་ནད་ཀྱི་ནད་རྟགས་ཡོད་ན་དུས་ཐོག་ཏུ་འབྲེལ་ཡོད་ཚན་ཁག་ལ་སོང་ནས་བརྟག་དཔྱད་བྱ་དགོས་ཏེ། ཐོག་དང་པོར་བརྟག་དཔྱད་བྱེད་དུས་འཇུ་བྱེད་ཁོང་ནད་ཚན་ཁག་དང་མཆིན་ནད་ཚན་ཁག མཆིན་མཁྲིས་ཕྱི་ནད་ཚན་ཁག་སོགས་སུ་སོང་ཆོག འོན་ཀྱང་མཆིན་པའི་ཐུམ་འབུ་ནད་ཡིན་པར་ངོས་བཟུང་རྗེས་ཐུམ་འབུའི་ནད་ཀྱི་ཆེད་ལས་སྨན་ཁང་དུ་འགྲོ་དགོས། འབྲེལ་ཡོད་ཀྱི་བརྟག་དཔྱད་ལXཐིག་བརྟག་དཔྱད་དང་། ཚད་བརྒལ་སྒྲ་རླབས། CT རིམས་འགོག་རིག་པའི་ཞིབ་དཔྱད་སོགས་ཡོད་ལ། ནད་བབ་མི་འདྲ་བ་དང་བསྟུན་ནས་སྤྱོད་སྒོའང་མི་འདྲ།
སྨན་བཅོས།
མིག་སྔར་གཤགས་བཅོས་ནི་ཐུམ་འབུའི་ནད་ཀྱི་བཅོས་ཐབས་ལེགས་ཤོས་ཡིན་པ་དང་། ནད་བབ་ལ་གཞིགས་ནས་མཆིན་པ་གཅོད་འབྱིན་གཤགས་བཅོས་དང་མཆིན་པ་བརྗེ་བའི་གཤགས་བཅོས་སོགས་བསྟེན་ཆོག་ལ། ནད་བབ་ཇེ་སྡུག་ཏུ་འགྱུར་བ་ཚོད་འཛིན་བྱེད་པའི་སྨན་ཡང་ཡོད།
སྔོན་འགོག
1.ཟ་མའི་འཕྲོད་བསྟེན། ཟ་མ་མ་ཟོས་སྔོན་ལ་ལག་པ་བཀྲུ་བ་དང་། ཟས་འཁྱགས་པ་དང་ཚ་བོ་མཉམ་དུ་མི་འཇོག་པ། གཡོས་སྦྱོར་མ་བྱས་པའི་ཟས་རློན་པ་མི་ཟ་བ། ལྷག་པར་དུ་ཕྱི་རོལ་དུ་ཡུལ་སྐོར་ལ་འགྲོ་སྐབས་སུ་ཟ་མ་རློན་པ་དང་སྦགས་བཙོག་བཟོས་པའི་ཆུ་མི་འཐུང་བ།
2.ཁྱི་དང་སྒོ་ཕྱུགས་སོགས་ལ་འགོག་སྨན་རྒྱག་པ་དང་། ཡོང་ཁུངས་མི་ཤེས་པའི་ཁྱི་ཆ་མེད་ལ་ལག་པས་མི་རེག་པ། ཐུམ་འབུའི་ནད་ཁུལ་གྱི་ཁྱི་དང་སྒོ་ཕྱུགས་སོགས་ལ་འབྲེལ་འདྲིས་དམ་ཟབ་མི་བྱེད་པ། གལ་ཏེ་ཁྱི་དང་སྒོ་ཕྱུགས་སོགས་ལ་ལག་པས་རེག་པ་ཡིན་ན་ཆུ་གཙང་མ་དང་འདག་རྫས་ཀྱིས་ལག་པ་བཀྲུ་བ། ལག་པའི་སེན་མོའི་བར་ལ་གཙང་སེལ་བྱེད་པ། ཟ་མའི་སྔོན་དང་ཆབ་གསང་ལ་བུད་པའི་རྗེས་ལ་ལག་པ་བཀྲུ་བའི་གོམས་གཤིས་ཆགས་སུ་འཇུག་པ།
3.སྲོག་ཆགས་ཀྱི་ནང་ཁྲོལ་གཙང་སེལ་ཡག་པོ་བྱ་དགོས་ཏེ། ལྷག་པར་དུ་ཐུམ་འབུའི་ནད་འབྱུང་བའི་ས་ཁུལ་ཡིན་ན་ནང་ཁྲོལ་མེར་སྲེག་པའམ་ས་འོག་ཏུ་སྦེད་པ་སོགས་བྱས་ན་བཟང་།
4.ཐུམ་འབུའི་ནད་ལ་འགོག་སྲུང་སྨན་རྫས་མེད་པས། རང་ཉིད་དང་ཁྱིམ་མིས་རྒྱུན་པར་ཁྱི་ལ་འབྲེལ་འདྲིས་བྱ་དགོས་ན། དུས་ཚོད་ལྟར་ཁྱིའི་ལུས་ཀྱི་ནད་འབུ་རྩ་མེད་གཏོང་དགོས།
5.རྒྱུན་ལྡན་གྱི་འཚོ་བའི་ཁྲོད་དུ་སྲོག་ཆགས་མི་གཙང་བ་དང་འབྲེལ་འདྲིས་དམ་ཟབ་མི་བྱེད་པ་དང་། སྒོ་ཕྱུགས་འཚོ་སྐྱོང་བྱེད་མཁན་གྱིས་སྲོག་ཆགས་ཀྱི་ནད་སྔོན་འགོག་བྱ་རྒྱུར་དོ་སྣང་བྱེད་པ།
6.ལུས་ཕུང་སྦྱོང་བརྡར་བྱས་ཏེ། རིམས་འགོག་ནུས་པ་ཇེ་བཟང་ལ་གཏོང་བ།
རྩོམ་སྒྲིག་པ། མང་ག་མཚོ།
