མི་ཁྲི་10ཡིས་ལན་ཡུན་ཀང་གྲུ་ཁའི་རི་འགོག་རི་བོའི་མིང་མེད་སྔོན་གཤེགས་དཔའ་བོར་དུར་མཆོད་བྱས་པ།
སྤེལ་དུས 2021-04-06
ཡོང་ཁུངས། མི་དམངས་ཉིན་རེའི་ཚགས་པར།
རྩོམ་པ་པོ།
ཉེ་ཆར། ཅང་སུའུ་ལན་ཡུན་ཀང་གྲུ་ཁའི་རི་འགོག་རི་བོའི་སྔོན་གཤེགས་དཔའ་བོའི་བང་སོའི་སྐྱེད་ཚལ་གྱི་མིང་མེད་སྔོན་གཤེགས་དཔའ་བོའི་བང་སོའི་མདུན་དུ། རྒྱལ་ཁབ་གློག་དྲ་ལན་ཡུན་ཀང་གྲུ་ཁའི་གློག་གཏོང་ཀུང་སིའི་རི་འགོག་རི་བོའི་ཏང་ཡོན་ཞབས་ཞུ་རུ་ཁག་གི་རུ་མི་ཚོས་དཀར་གཙང་གི་མེ་ཏོག་ཕྲེང་བ་ཕུལ་ནས་སྔོན་གཤེགས་དཔའ་བོར་མྱ་ངན་ཞུས་པ་རེད། རྒྱལ་ཁབ་གློག་དྲ་ལན་ཡུན་ཀང་གྲུ་ཁའི་གློག་གཏོང་ཀུང་སིའི་ཏང་འཛུགས་སྐྱོང་པུའི་ཀྲུའུ་རེན་ལི་ཧུའེ་ཡིས། ང་ཚོས་ལོ་ལྟར་དུས་བཀག་ལྟར་མིང་མེད་སྔོན་གཤེགས་དཔའ་བོའི་བང་སོར་དུར་མཆོད་བྱེད་པར་བསྐྱོད་པ་མ་ཟད། ཆེད་དོན་མ་དངུལ་གྲབས་གསོག་བྱས་པ་དེ་དག་མིང་མེད་སྔོན་གཤེགས་དཔའ་བོའི་བང་སོ་ཉམས་གསོ་དང་དུར་མཆོད་དུ་སྤྱོད་ཀྱི་ཡོད་ཅེས་བརྗོད། ངོ་སྤྲོད་བྱས་པར་གཞིགས་ན། དྭངས་གསལ་དུས་ཚིགས་ཀྱི་ཉིན་དེར། རི་འགོག་རི་བོར་དུར་མཆོད་བྱེད་པར་ཡོང་མཁན་མི་ཐེངས་ཁྲི་10ཟིན་ཡོད།
རི་འགོག་རི་བོའི་སྔོན་གཤེགས་དཔའ་བོའི་བང་སོའི་སྐྱེད་ཚལ་ནི་ལན་ཡུན་ཀང་གྲོང་ཁྱེར་ཀན་ཡུས་ཆུས་ཀྱི་ཁོངས་སུ་གནས་པ་དེ་ནི་1941ལོར་གསར་སྐྲུན་བྱས་པ་དང་།
རྗེས་སུ་ཉམས་བཟོ་ཐེངས་མང་བྱས་ཡོད། བང་སོའི་སྐྱེད་ཚལ་ནང་རི་འགོག་དམག་འཁྲུག་སྐབས་རང་སྲོག་ཤོར་བའི་སྔོན་གཤེགས་དཔའ་བོ་1800ལྷག་ཙམ་པུར་འཇུག་བྱས་པ་དེའི་ནང་མིང་མེད་སྔོན་གཤེགས་དཔའ་བོའི་བང་སོ་102དང་། མིང་མེད་སྔོན་གཤེགས་དཔའ་བོ་318ཡོད་པ་རེད།
ལན་ཡུན་ཀང་གྲོང་ཁྱེར་ཀན་ཡུས་ཆུས་ཁྲེང་ཐོའུ་མཐོ་རིམ་སློབ་འབྲིང་གི་སློབ་མ་ཚོས་མེ་ཏོག་སོས་པ་ཆགས་པ་རེ་རེ་བཞིན་བང་སོའི་མདུན་དུ་བཞག་ནས་གུས་འདུད་ཞུས་པ་དང་། སློབ་སྤྱི་ལིའུ་ཧྲི་ཧྥན་གྱིས་ལོ་ལྟར་དྭངས་གསལ་དུས་ཚིགས་རིང་ང་ཚོས་མཐོ་རིམ་སློབ་འབྲིང་ལོ་རིམ་དང་པོའི་སློབ་མ་སྒྲིག་འཛུགས་བྱས་ཏེ་རྐང་ཐང་མར་སྤྱི་ལེ་10ཙམ་བསྐྱོད་ནས་རི་འགོག་རི་བོའི་མིང་མེད་སྔོན་གཤེགས་དཔའ་བོའི་བང་སོར་དུར་མཆོད་བྱེད་ཀྱི་ཡོད་ཅེས་བརྗོད་པ་རེད།
རྩོམ་སྒྲིག་པ། བདེ་སྒྲོལ།