2025ལོའི་བོད་ལྗོངས་ཀྱི་GDPའཕར་ཚད་རྒྱལ་ཡོངས་ཀྱི་མདུན་གྲལ་དུ་སླེབས་པ།
སྤེལ་དུས 2026-01-29
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
2026ལོའི་ཟླ་1ཚེས་26ཉིན། བོད་རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་དོན་ཁང་གིས་2025ལོའི་བོད་རང་སྐྱོང་ལྗོངས་ཀྱི་དཔལ་འབྱོར་འཁོར་སྐྱོད་གནས་ཚུལ་སྐོར་གྱི་གསར་འགྱུར་ཡོངས་བསྒྲགས་ཚོགས་འདུ་འཚོགས་པ་རེད།
གསར་འགོད་པར་ཤེས་རྟོགས་བྱུང་བར་གཞིགས་ན། 2025ལོར་བོད་ལྗོངས་ཡོངས་ཀྱི་དཔལ་འབྱོར་འཁོར་སྐྱོད་སྤྱིའི་ཆ་ནས་བརྟན་པོ་དང་། བརན་ཐོག་ཡར་འཕེལ་གྱི་རྣམ་པ་བཟང་པོ་མངོན་ཡོད་ལ། སྔོན་དཔག་དམིགས་ཚད་དང་ལས་འགན་གཙོ་བོ་རྣམས་ཕུན་སུམ་ཚོགས་པོའི་ངང་མངོན་འགྱུར་བྱུང་སྟེ་“ལོ་ལྔ་ཚན་བཅུ་བཞི་པའི”འཆར་འགོད་རྒྱལ་ཁའི་ངང་མཇུག་བསྡུས་ཡོད།
ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་གཅིག་གྱུར་ཞིབ་རྩིས་བྱས་འབྲས་ལྟར་ན། 2025ལོར་བོད་ལྗོངས་ཀྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་3031.89མངོན་འགྱུར་བྱུང་བ་དེ། འགྱུར་མེད་རིན་གོང་ལྟར་བརྩིས་ན་དུས་མཚུངས་ལས་7.0%འཕར་བ་དང་། འཕར་ཚད་དེ་དུས་ཚིགས་བཞི་བསྟུད་མར་རྒྱལ་ཡོངས་ཀྱི་མདུན་གྲལ་དུ་སླེབས་ཡོད།
གྲོང་མི་ཡོངས་ཀྱི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་33600ཟིན་པ་དེ་དུས་མཚུངས་ལས་7.2%འཕར་ཡོད། དེའི་ནང་གྲོང་ཁྱེར་དང་གྲོང་རྡལ་གྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་58794ཟིན་ནས་6.0%འཕར་བ་དང་། གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ 23184 ཟིན་ནས་7.4%འཕར་ཡོད།
2025ལོར། ལྗོངས་ཡོངས་སུ་རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་7073.37ལ་སྣེ་ལེན་ཞུས་པ་དེ་10.7%འཕར་བ་དང་། ཡུལ་སྐོར་གྱི་སྤྱིའི་འགྲོ་གྲོན་སྒོར་དུང་ཕྱུར་816.81ཟིན་ནས་9.5%འཕར་ཡོད། གཞན་ཡང་འགྲིམ་འགྲུལ་སྐྱེལ་འདྲེན་བརྟན་པོའི་ངང་འཕར་སྣོན་བྱུང་བ་དང་གློག་སྤྱོད་ཚད་བརྟན་པོ་རྒྱུན་འཁྱོངས་ཐུབ་ཡོད།
