ཟླ་བ་དང་པོར་ནང་སོག་ཝུའུ་ལན་ཀྲ་པུའུ་གྲོང་ཁྱེར་ཀྲོའུ་ཙི་རྫོང་ཧོང་ཆི་ཐན་གྲོང་ཚོའི་ཁྱིམ་ཚང་ཚང་མའི་རྒྱལ་སྒོའི་མདུན་དུ་ལྒང་ཞུ་དམར་པོ་ཆེན་པོ་བཀལ་ནས་ལོ་གསར་གྱི་རྣམ་པ་ཧ་ཅང་ཟབ་ཅིང་། ལྒང་ཞུ་དེ་དག་ནི་ལོ་གསར་གོང་གྲོང་ཚོ་ཨུ་ལྷན་གྱིས་རིན་མེད་ངང་སྤྲད་ནས་བསྒར་བ་རེད།
“ད་ཆ་གྲོང་ཚོའི་ཐབས་ཇུས་གལ་ཆེན་འགོད་དུས་ང་ཚོས་གྲོང་མིའི་བསམ་འཆར་ཉན་གྱི་ཡོད། རིན་མེད་ངང་ལྒང་ཞུ་བསྒར་བ་དེ་ཡང་བསམ་འཆར་བསྡུ་ལེན་བྱས་ནས་གྲོང་མི་ཕྱེད་ཀ་ལྷག་ཙམ་གྱི་མོས་མཐུན་བྱུང་རྗེས་བསྒར་བ་ཡིན”ཞེས་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཧོང་ཆི་ཐན་གྲོང་ཚོའི་ཏང་ཀྲི་པུའི་ཧྲུའུ་ཅི་ཞུའེ་ཀྲི་ལུང་གིས་བརྗོད། གྲོང་ཚོ་རིམ་པའི་ལས་དོན་དོ་དམ་ལས་སྟེགས་ཀྱི་བྱ་རིམ་ཆུང་ངུ་བརྒྱུད། ཧོང་ཆི་ཐན་གྲོང་ཚོའི་ཡུལ་མིས་གནད་དོན་དང་བསམ་འཆར་འདོན་པ་དང་ཆབས་ཅིག གྲོང་ཚོའི་ནང་ད་དུང་མང་ཚོགས་ཀྱི་རེ་ཞུའི་གཱ་ཡང་སྤྲད་ཡོད་པ་རེད།
“གཞི་རིམ་གྱི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཞིག་ཡིན་པའི་ངོས་ནས། ཡུལ་མི་ཚོའི་བསམ་འཆར་ནི་ངས་ཡུལ་བབ་དམངས་འདུན་གོང་ཞུ་དང་འབྲེལ་ཡོད་གྲོས་འགོ་འདོན་པའི་གཞི་འཛིན་ས་གལ་ཆེན་ཞིག་ཡིན”ཞེས་ཞུའེ་ཀྲི་ལུང་གིས་བརྗོད།
རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མིར་བདམས་ཚུན། ཞུའེ་ཀྲི་ལུང་གིས་བརྟག་ཞིབ་གཏིང་ཟབ་བྱས་ནས་ཡོངས་ཁྱབ་རང་བཞིན་གྱི་རེ་འདོད་དག་གྲོས་འགོ་རེ་རེར་བསྒྱུར་ཞིང་། སྐམ་འདེབས་ཞིང་ལས་ཀྱི་ཚད་གཞི་མཐོ་བའི་ཞིང་ཁ་འཛུགས་སྐྲུན་དང་། ཞིང་འབྲོག་ལས་འགན་བཅོལ་ཀུང་སི་འཛུགས་རྒྱུར་སྐུལ་འདེད། གྲོང་གསེབ་ཀྱི་རྒན་གསོའི་ཞབས་ཞུའི་མ་ལག་གཏོད་རྒྱུར་སྐུལ་འདེད་སོགས་ལ་དམིགས་ནས་གྲོས་འགོ་ཁག་9བཏོན་པ་དང་། དེ་དག་ཚང་མར་ལན་ཡག་པོ་བྱུང་བ་རེད།
མུའུ་8000ལྷག་ཙམ་གྱི་ལྗོན་ཤིང་ཉིང་ཐེའོ་དང་རི་སྐྱེས་ཁམ་བུ་སོགས་ལྡན་པའི་ཧོང་ཆི་ཐན་གྲོང་ཚོའི་ནགས་གསེབ་དཔལ་འབྱོར་ཇི་ལྟར་གཉེར་སྐྱོང་བྱས་རུང་འཕེལ་རྒྱས་འགྲོ་ཁག་པོ་ཡོད་པ་རེད། ན་ནིང་ཞུའེ་ཀྲི་ལུང་གིས་ཧུའུ་ལུན་པེར་དང་། ཐུང་ལེའོ། ཁྲེ་ཧྥུང་སོགས་སུ་བསྐྱོད་ནས་བྱེ་འགོག་བྱེ་བརྟན་དང་ལྗོན་ཤིང་ཉིང་ཐེའོ་བརྔ་བསྡུ་སོགས་ལ་དམིགས་ནས་བརྟག་ཞིབ་བྱས་ཏེ། གོམ་སྟབས་རྗེས་མར་ནགས་གསེབ་དཔལ་འབྱོར་འཕེལ་རྒྱས་ཡག་པོ་གཏོང་རྒྱུར་འབྲེལ་ཡོད་གྲོས་འགོ་གྲ་སྒྲིག་བྱས་པ་རེད།
གྲོང་གསེབ་ཀྱི་རྒན་གསོ་ཡང་ཞུའེ་ཀྲི་ལུང་གིས་གཙོ་བོ་དོ་ཁུར་བྱེད་པའི་གནད་དོན་ཞིག་རེད། “གྲོང་གསེབ་རྒན་རོགས་ཟ་ཁང་ཇི་ལྟར་ཡུན་རིང་འཁོར་སྐྱོད་ཐུབ་པ་དང་། གྲོང་གསེབ་ཀྱི་ལོ་ན་རྒན་པ་དང་། ཁེར་སྡོད། ནུས་ཤོར་སོགས་དམིགས་བསལ་དཀའ་ངལ་ཡོད་པའི་རྒན་རྒོན་གྱི་འབྲེལ་ཡོད་སྲིད་ཇུས་ཇི་ལྟར་སྔར་བས་ཞིབ་ཕྲ་དང་ཁ་གསལ་ཡོང་བར་འགན་ལེན་བྱ་རྒྱུ་སོགས་ནི་ངས་ཡུན་རིང་དོ་ཁུར་བྱེད་པའི་ཁྱབ་ཁོངས་ཡིན། ད་ལོ་ངས་མུ་མཐུད་གྲོང་གསེབ་ཀྱི་རྒན་གསོའི་གནད་དོན་ལ་དམིགས་ནས་གྲོས་འགོ་འདོན་རྒྱུ་ཡིན”ཞེས་ཞུའེ་ཀྲི་ལུང་གིས་བརྗོད། ད་ལོའི་རྒྱལ་ཡོངས་ཚོགས་འདུ་གཉིས་ཐོག་ཁོང་གིས་གཞི་རིམ་གྱི་རེ་འབོད་དག་གྲོས་འགོ་དངོས་ལ་བསྒྱུར་ནས་ཚང་མའི་བསམ་འཆར་ཚོགས་རར་བཤད་དེ། ཡུལ་མིའི་བསམ་འཆར་གོ་ཐུབ་ལ་ལན་ཡང་ཡོད་པར་བྱེད་རྒྱུ་ཡིན།
