རྒྱལ་ཡོངས་ཚོགས་འདུ་གཉིས་འཚོག་ལ་ཉེ་བའི་མཚམས་སུ། རྒྱལ་ཡོངས་སྲིད་གྲོས་ཀྱི་ཨུ་ཡོན་དང་ཀོང་ཤིས་ལུས་རྩལ་མཐོ་རིམ་ཆེད་ཚན་སློབ་གྲྭའི་རྩིས་བཤེར་དང་སྤུས་ཚད་དོ་དམ་ཁྲུའི་ཁྲུའུ་ཀྲང་ཝེ་ཅུན་ལས་ཀའི་ཟིན་བྲིས་ལེགས་སྒྲིག་དང་གྲོས་གཞིའི་ནང་དོན་འཐུས་སྒོ་ཚང་དུ་གཏོང་རྒྱུར་བྲེལ་བཞིན་ཡོད།
“ད་ལོ་ང་ཚོས་དོ་ཁུར་བྱེད་ས་ནི་ལས་རིགས་སློབ་གསོའི་གསོ་སྦྱོང་གིས་དཀའ་ངལ་ཡོད་པའི་ཚོགས་སྤྱི་དང་དམིགས་བསལ་ཚོགས་སྤྱིར་ཇི་ལྟར་ཞབས་འདེགས་དེ་བས་ལེགས་པ་ཞུ་རྒྱུ་དེ་ཡིན”ན་ནིང་བརྟག་ཞིབ་བྱེད་སྐབས་ངས་རྐང་པ་སྐྱོན་ཅན་གྱི་གཞོན་ནུ་ཞིག་གིས་དར་སྐུད་གྲུ་གུ་འཚེམ་བཞིན་ཡོད་པ་མཐོང་བྱུང་། དར་སྐུད་གྲུ་གུ་ཧ་ཅང་སྤུས་དག་པོ་འདུག་ཀྱང་། ཟླ་བ་གཅིག་ལ་གསུམ་ནས་ལྔ་བར་མ་གཏོགས་བཙོངས་ཐུབ་ཀྱི་མེད་ཅེས་གསར་འགོད་པར་བཤད།
“ངས་མཐོང་བ་ནི་མི་སྒེར་གྱིས་མཛེས་སྡུག་ལྡན་པའི་འཚོ་བར་བཅངས་པའི་རེ་འདོད་ཡིན་ལ། ཀུན་ཕན་གསོ་སྦྱོང་དང་རང་སོའི་ཁྱད་ཆོས་ལྡན་པའི་དགོས་མཁོའི་དབར་གྱི་ཧེ་བག་ཀྱང་ཡིན་པས། དེ་ནི་དམངས་འཚོའི་གནད་དོན་ཞིག་རེད། ང་ཚོས་དབང་སྐྱོན་མི་སྣར་ལས་ཀ་ལས་རྒྱུ་ཡོད་པ་བྱེད་དགོས་པ་མ་ཟད། ཁོང་ཚོས་ཡག་པོ་ལས་ཐུབ་པར་བྱེད་དགོས། ཁྱད་ཆོས་ལྡན་པའི་ལས་རིགས་རྩལ་ནུས་གསོ་སྐྱོང་ནི་གནད་དོན་དེ་ཐག་གཅོད་བྱེད་པའི་ཐབས་མཆོག་ཅིག་རེད”ཅེས་ཝེ་ཅུན་གྱིས་བསམ་གཞིག་ཡང་ཡང་བྱས་ནས་གསུངས།
གནད་དོན་གྱི་འགག་རྩ་ཤེས་རྗེས། ཝེ་ཅུན་གྱིས་བརྟག་ཞིབ་ཐེངས་མང་གནང་ཞིང་། ལས་རིགས་སློབ་གྲྭར་བསྐྱོད་དེ་དགེ་སློབ་ཚོས་ལས་རིགས་འཕེལ་རྒྱས་ཀྱི་མདུན་ལམ་ལ་སེམས་ཁྲལ་དང་རེ་སྒུག་གང་དག་ཡོད་མིན་ཤེས་རྟོགས་དང་། ཀྲུང་ཧྭ་ལས་རིགས་སློབ་གསོ་ཁང་གི་རིགས་གཅིག་མཁས་ཅན་ལ་འཚམས་འདྲི། ཁེ་ལས་མཁས་ཅན་གྱིས་ལག་རྩལ་མཐོ་བའི་ཤེས་ལྡན་པར་ཁས་ལེན་དཔང་འདོན་དང་གདེང་འཇོག་བྱེད་པའི་མྱོང་ཚོར་ཉན་པ་སོགས་ཀྱི་ལས་མང་པོ་བསྒྲུབས་པ་རེད།
“མི་ཁག་གཅིག་གིས་ལས་རིགས་སློབ་གསོར་སྔར་བཞིན་ལྟ་བ་རྙིང་པ་མཁྲེགས་འཛིན་བྱེད་ཀྱི་ཡོད། དེའི་རྩ་བ་་ནི་ལས་རིགས་སློབ་གསོའི་གསོ་སྐྱོང་གི་ཁ་ཕྱོགས་དང་། ཁེ་ལས་ཀྱི་དགོས་མཁོ། ལས་རིགས་ཁྲོམ་ར་བཅས་དབར་ཧེ་བག་ཡོད་པའི་ཁར། ལས་རིགས་སློབ་གསོའི་གསོ་སྐྱོང་གི་གྲུབ་འབྲས་ངེས་གཟུང་དང་སྤྱིར་བཏང་སློབ་གསོའི་བར་ཧེ་བག་ཡོད་པས། མི་མང་པོ་ཞིག་གིས་ལས་རིགས་སློབ་གསོ་འདེམས་ཕོད་ཀྱི་མེད”ད་ལོའི་རྒྱལ་ཡོངས་སྲིད་གྲོས་རྒྱུན་ལས་ཨུ་ལྷན་གྱི་ཚོགས་ཆུང་གྲོས་བསྡུར་ཐོག ཝེ་ཅུན་གྱིས་དེའི་ཆེད་དུ་དགེ་མཚན་ལྡན་པའི་གཏམ་བཤད་གནང་བ་དང་མཁས་དབང་གི་བསམ་འཆར་ཡང་ཉན་པས། ཁོང་གིས་དེ་དང་འབྲེལ་བའི་གྲོས་གཞི་འདོན་རྒྱུའི་གདེང་ཚོད་བརྟན་དུ་སོང་ཡོད།
“ངའི་གྲོས་གཞི་མང་པོ་ཞིག་ལོ་གཅིག་ལ་བྱུང་བ་ཞིག་མིན་ལ། མི་གཅིག་ཁོ་ནར་བརྟེན་པ་ཡང་མིན་པར། རྒྱུན་མཐུད་གསོག་འཇོག་ཟབ་འཇུག་དང་ཚོགས་པས་མཉམ་དུ་འབད་བརྩོན་བྱས་པའི་བརྒྱུད་རིམ་ཞིག་ཡིན” བརྟག་ཞིབ་ཟབ་ཏུ་ཕྱིན་པ་དང་བསྟུན་ནས། ཝེ་ཅུན་གྱིས་དབང་སྐྱོན་མི་སྣའི་ལས་ཞུགས་ནི་དབང་སྐྱོན་མཉམ་འབྲེལ་ལྷན་ཚོགས་དང་། མི་སྤྱི། སློབ་གསོ། དམངས་སྲིད་སོགས་སྡེ་ཚན་མང་པོ་དང་འབྲེལ་བ་ཡོད་པ་ཤེས། གནད་དོན་ཐག་གཅོད་བྱེད་དགོས་ན། ཚང་མའི་སྲོལ་རྒྱུན་གྱི་ལྟ་བར་འགྱུར་ལྡོག་གཏོང་དགོས་ལ། སྡེ་ཚན་ཁག་གི་མཉམ་རོགས་ཤུགས་འདོན་ལའང་སྐུལ་འདེད་གཏོང་དགོས། དེར་བརྟེན། ཝེ་ཅུན་གྱིས་གྲོས་གཞིའི་ནང་སྡེ་ཚན་མི་འདྲ་བའི་མཉམ་ཞུགས་ཚོགས་འདུའི་ལམ་ལུགས་བཟོ་བ་དང་ཆ་འཕྲིན་མཉམ་སྤྱོད་ལས་སྟེགས་འཛུགས་པ་སོགས་ལམ་སྲོལ་རང་བཞིན་གྱི་གྲོས་འགོ་བཏོན་ནས་སྲིད་ཇུས་དང་ལམ་ལུགས་མཉམ་དུ་ནུས་པ་འདོན་རྒྱུར་སྐུལ་འདེད་བཏང་བ་རེད།
