སྤྱི་བདེ་པུས་སྒྲུབ་འགན་ཁུར་བའི་2025ལོའི་རྒྱལ་ཡོངས་ཚོགས་འདུ་གཉིས་ཀྱི་གྲོས་འགོ་དང་གྲོས་གཞི་ཁག་743ཚང་མ་ཐག་གཅོད་བྱས་པ།
སྤེལ་དུས 2026-03-05
ཡོང་ཁུངས། ཤིན་ཧྭ་གསར་འགྱུར་ཁང་།
རྩོམ་པ་པོ།
ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་3ཉིན་གློག་འཕྲིན་འབྱོར་གསལ། གསར་འགོད་པར་ཟླ་3ཚེས་3ཉིན་སྤྱི་བདེ་པུའུ་ནས་ཤེས་རྟོགས་བྱུང་བར། སྤྱི་བདེ་པུས་སྒྲུབ་འགན་འཁུར་བའི་2025ལོའི་རྒྱལ་ཡོངས་ཚོགས་འདུ་གཉིས་ཀྱི་གྲོས་འགོ་དང་གྲོས་གཞི་ཁག་743ཚང་མ་གཏན་འབེབས་ཀྱི་དུས་བཀག་ནང་སྤུས་ཚད་མཐོ་པོས་ཐག་གཅོད་བྱས་ཤིང་། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་རྒྱལ་ཡོངས་སྲིད་གྲོས་ཀྱི་ཨུ་ཡོན་རྣམ་པས་སྤྱི་བདེ་པུས་རྒྱལ་ཡོངས་ཚོགས་འདུ་གཉིས་ཀྱི་གྲོས་འགོ་དང་གྲོས་གཞི་ཐག་གཅོད་བྱས་པའི་ལས་དོན་ལ་བློ་ཡིད་ཚིམ་པོ་གནང་བ་རེད།
སྤྱི་བདེས་ཡུལ་གཞན་དུ་གྱོད་གཞི་སྒྲུབ་པའི་རོགས་ལས་ལམ་སྲོལ་འཐུས་སྒོ་ཚང་དུ་གཏོང་བ་དང་ཁྲིམས་སྐྱོང་ཅན་གྱི་ཚོང་གཉེར་ཁོར་ཡུག་ལེགས་སུ་གཏོང་བའི་གྲོས་འགོར་དམིགས་ནས། སྤྱི་བདེ་པུས་སྤྱི་བདེ་ལས་ཁུངས་ཀྱི་ཁེ་ལས་དང་འབྲེལ་བའི་ཁྲིམས་སྒྱུར་ཚད་ལྡན་དུ་གཏོང་བའི་ཆེད་དོན་བྱ་སྤྱོད་དང་ཟུང་འབྲེལ་བྱས་ནས། ཁྲིམས་སྒྱུར་ཐད་ཀྱི་གནད་དོན་མངོན་གསལ་དོད་རིགས་ལ་ཞིབ་བཤེར་དང་ཡོ་བསྲང་གཏིང་ཟབ་བྱས་པ་དང་། དམིགས་སའི་རང་བཞིན་ལྡན་པའི་སྒོ་ནས་ལམ་སྲོལ་དང་བྱེད་ཐབས་འཐུས་སྒོ་ཚང་དུ་བཏང་སྟེ། ཁྲིམས་སྒྱུར་ཚད་ལྡན་ཅན་འཛུགས་སྐྱོང་ལ་ཤུགས་སྣོན་བརྒྱབ་པ་རེད།
ཉེན་རྟོག་དང་ཁེ་ལས་དབར་གྱི་འབྲེལ་བ་ཟབ་ཏུ་གཏོང་རྒྱུའི་གྲོས་འགོར་དམིགས་ནས། སྤྱི་བདེ་པུས“མང་ཚོགས་དང་ཁེ་ལས་ལ་ཕན་པ་འདོགས་པའི་ལས་དོན་གྱི་ཁྲིད་སྟོན་ཁག་བཅུ”བཏོན་ཐོག་སྔ་རྗེས་སུ་པེ་ཅིང་དང་། ཐེན་ཅིན། ཀྲེ་ཅང་། ཧྥུའུ་ཅན་སོགས་སུ“ཁེ་ལས་ལ་སྲུང་སྐྱོང་དང་ཚོང་གཉེར་ལེགས་སུ་གཏོང་བའི”ཉེན་རྟོག་དང་ཁེ་ལས་དབར་སྙིང་གཏམ་ཤོད་རེས་ཀྱི་ཚོགས་འདུ་སྒྲིག་འཛུགས་བྱས་ཏེ། དོན་ཚན་རེ་རེ་བཞིན་ཞིབ་འཇུག་དང་ཐག་གཅོད་ནན་པོ་བྱས་ནས་ཁེ་ལས་ཀྱི་རེ་ཞུ་ཁག་ལ་ཨ་ལན་གསལ་པོ་བསློགས་པ་རེད།
ཚོང་ལས་ཀྱི་གསང་བ་སྲུང་སྐྱོང་བྱེད་པར་ཤུགས་སྣོན་རྒྱག་རྒྱུའི་གྲོས་འགོར་དམིགས་ནས། སྤྱི་བདེ་པུས་ཆེས་མཐོའི་མི་དམངས་ཁྲིམས་ཁང་དང་ཆེས་མཐོའི་མི་དམངས་ཞིབ་དཔྱོད་ཁང་སོགས་སྡེ་ཚན་དང་འབྲེལ་གཏུག་མཐུན་སྦྱོར་བྱས་པ་བརྒྱུད། བསམ་འཆར་དང་བྱེད་ཐབས་ཞིབ་འཇུག་བྱས་ནས་བཏོན་ཏེ། ཚོང་ལས་ཀྱི་གསང་བ་སྲུང་སྐྱོང་ལས་དོན་ལ་མཉམ་དུ་སྐུལ་འདེད་བཏང་བ་རེད།
ཤེས་རྟོགས་བྱུང་བར་གཞིགས་ན། སྤྱི་བདེ་པུས“ལས་དོན་མ་སྒྲུབ་གོང་འབྲེལ་གཏུག་བྱེད་པ་དང་། སྒྲུབ་སྐབས་གྲོས་མོལ་བྱེད་པ། བསྒྲུབས་རྗེས་ལན་སྤྲོད་པ”བཅས་མཐའ་འཁྱོངས་བྱས་ནས། སྒྲུབ་གཉེར་སྤུས་ཚད་ལེགས་སུ་གཏོང་རྒྱུར་དམ་འཛིན་ལྷོད་མེད་བྱས་ཐོག ལས་དོན་ཆེད་སྒྲུབ་ཚན་ཁག་འཛུགས་པ་དང་། ཕྱོགས་བསྡུས་དབྱེ་ཞིབ་ལ་ཤུགས་སྣོན་རྒྱག་པ། རྗེས་སྙེག་སྒྲུབ་སྐུལ་ལ་ཤུགས་སྣོན་རྒྱག་པ། ཞིབ་དཔྱད་ཀྱི་འགག་སྒོར་དམ་འཛིན་ནན་པོ་བཅས་བྱས་ནས་གྲོས་འགོ་དང་གྲོས་གཞི་ཐག་གཅོད་བྱེད་པའི་གདུབ་ཟུམ་ལམ་སྲོལ་འཐུས་སྒོ་ཚང་དུ་རྒྱུན་མཐུད་བཏང་སྟེ། གྲོས་འགོ་དང་གྲོས་གཞི་ཚང་མ་ཐག་གཅོད་ཡག་པོ་དང་། ཐག་གཅོད་ཏན་ཏིག ཐག་གཅོད་མཐར་ཐུག་བཅས་ཧུར་ཐག་བྱས་ཡོད།
