ཟླ་11ཚེས་22ཉིན། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཕྱི་འབྲེལ་པུའི་པུའུ་ཀྲང་ཝང་དབྱི་ཡིས་དུ་ཤང་པེ་རུ་ཐ་ཇིག་སི་ཐན་གྱི་ཕྱི་འབྲེལ་པུའུ་ཀྲང་མུའུ་ཧོ་ལི་ཏིང་དང་འཐབ་ཇུས་གླེང་མོལ་ཐོག་མ་བྱས་ཤིང་། ཕྱོགས་གཉིས་ཀྱིས་རྒྱལ་ཁབ་གཉིས་ཀྱི་གཙོ་བདག་གི་ཐུན་མོང་ངོས་འཛིན་དོན་འཁྱོལ་དང་གཉིས་ཕན་མཉམ་ལས་ཟབ་ཏུ་གཏོང་རྒྱུའི་ཐད་འབྲེལ་གཏུག་གཏིང་ཟབ་བྱས་ཏེ། ཐུན་མོང་ངོས་འཛིན་རྒྱ་ཁྱབ་བྱུང་ནས་རྒྱལ་ཁབ་གཉིས་ཀྱི་ཕྱི་འབྲེལ་པུའུ་ཀྲང་གི་འཐབ་ཇུས་གླེང་མོལ་ལམ་སྲོལ་མཉམ་དུ་སྤེལ་འགོ་ཚུགས་པ་རེད།
ཝང་དབྱི་ཡིས། ཀྲུའུ་ཞི་ཞི་ཅིན་ཕིང་དང་ཙུང་ཐུང་ལཱ་ཧོ་མོང་གི་འཐབ་ཇུས་ཀྱི་སྣེ་ཁྲིད་འོག་ཀྲུང་གོ་དང་ཐ་ཇིག་སི་ཐན་གྱི་འབྲེལ་བ་རྒྱུན་ཆད་མེད་པར་སྐས་རིམ་གསར་པ་ཞིག་ཏུ་སླེབས་ཡོད། ད་ལོ་རྒྱལ་ཁབ་གཉིས་ཀྱི་གཙོ་བདག་ཞལ་འཛོམས་ཐེངས་གཉིས་གནང་ནས་ཕྱོགས་གཉིས་ཀྱི་འབྲེལ་བ་གོང་འཕེལ་ཡོང་ཆེད་བཀོད་སྒྲིག་གསར་པ་གནང་ཡོད། ཀྲུང་གོ་ཕྱོགས་ཀྱིས་ཐ་ཇིག་སི་ཐན་ཕྱོགས་དང་མཉམ་དུ་གཙོ་བདག་གི་ཐུན་མོང་ངོས་འཛིན་ལ་བརྩི་སྲུང་ཞུས་ཏེ་འཐབ་ཇུས་ཀྱི་མཐོ་ཚད་ནས་ཕྱོགས་གཉིས་ཀྱི་འབྲེལ་བར་ལྟ་སྟངས་འཛིན་པ་དང་འཕེལ་རྒྱས་གཏོང་བ་དང་། མི་རབས་ནས་མི་རབས་བར་མཛའ་གྲོགས་རྒྱུན་མཐུད་བྱས་ཏེ་སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་གྱིས་ཀྲུང་གོ་དང་ཐ་ཇིག་སི་ཐན་གྱི་དུས་རབས་གསར་པའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བར་འཕེལ་རྒྱས་གསར་པ་ཡོང་བར་སྐུལ་འདེད་གཏོང་འདོད་ཡོད་ཅེས་གསུངས་པ་རེད།
ཝང་དབྱི་ཡིས་ཀྲུང་གུང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་འབྲེལ་ཡོད་གནས་ཚུལ་ངོ་སྤྲོད་གནང་བ་མ་ཟད། ཁོང་གིས་ལོ་ལྔའི་འཆར་འགོད་ཚན་རིག་དང་མཐུན་པའི་སྒོ་ནས་བཟོས་པ་དང་མུ་མཐུད་ལག་བསྟར་བྱེད་པ་ནི་ཀྲུང་གོ་གུང་ཁྲན་ཏང་གི་རྒྱལ་སྲིད་སྐྱོང་ལུགས་ཀྱི་ཉམས་མྱོང་གལ་ཆེན་ཞིག་ཡིན་ལ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཆབ་སྲིད་ལེགས་ཆ་གལ་ཆེན་ཞིག་ཀྱང་ཡིན། འགྱུར་ལྡོག་དང་ཟང་ཟིང་ཆེ་བའི་རྒྱལ་སྤྱིའི་དུས་བབ་ཀྱི་མདུན་དུ་ཕྱོགས་གཉིས་ཀྱིས་འཐབ་ཇུས་ཀྱི་གླེང་མོལ་ལམ་སྲོལ་སྤེལ་འགོ་བཙུགས་པ་ནི་དུས་ལ་བབ་པ་ཞིག་རེད་ཅེས་གསུངས་ཤིང་། ཁོང་གིས་དེའི་ཐད་གྲོས་འགོ་ཁག་ལྔ་བཏོན་གནང་བ་སྟེ།
གཅིག བློ་བརྟན་འགྱུར་མེད་ངང་ཕན་ཚུན་རྒྱབ་སྐྱོར་བྱེད་དགོས། ཀྲུང་གོ་ཕྱོགས་ཀྱིས་ཐ་ཇིག་སི་ཐན་ཕྱོགས་ཀྱི་རང་སོ་སོའི་རྒྱལ་བབ་དང་མཐུན་པའི་འཕེལ་རྒྱས་འགྲོ་ལམ་དུ་བསྐྱོད་པར་སྔར་རྒྱུན་བཞིན་རྒྱབ་སྐྱོར་བྱེད་ཀྱི་ཡིན། ཐའེ་དབན་སོགས་ཀྲུང་གོའི་ལྟེ་བའི་ཁེ་ཕན་དང་འབྲེལ་བའི་གནད་དོན་ཐད་ཐ་ཇིག་སི་ཐན་ཕྱོགས་ཀྱིས་བློ་བརྟན་འགྱུར་མེད་ངང་རྒྱབ་སྐྱོར་བྱས་པར་ཐུགས་རྗེ་ཆེ་ཞུ་གི་ཡིན། ཀྲུང་གོ་ཕྱོགས་ཀྱིས་རི་པིན་གྱི་གཡས་རུའི་སྟོབས་ཤུགས་ཀྱིས་ལོ་རྒྱུས་ཀྱི་འཁོར་ལོ་ལྟག་ལོག་རྒྱག་ཏུ་གཏན་ནས་འཇུག་གི་མིན་ལ། ཕྱི་ཕྱོགས་སྟོབས་ཤུགས་ཀྱིས་ཀྲུང་གོའི་ཐའེ་དབན་ས་ཁུལ་ལ་ཐེ་ཇུས་གཏན་ནས་བྱེད་དུ་མི་འཇུག་པ་དང་རི་པིན་དམག་རྒྱལ་རིང་ལུགས་སླར་ཡང་རོ་ལངས་རྒྱག་ཏུ་གཏན་ནས་འཇུག་གི་མིན། ཕྱོགས་ཁག་དང་མཉམ་དུ་ཀྲུང་གོ་གཅིག་གི་རྩ་དོན་གྱི་རྒྱལ་སྤྱིའི་ཐུན་མོང་ངོས་འཛིན་ལ་སྲུང་སྐྱོང་དང་། འཛམ་གླིང་དམག་ཆེན་གཉིས་པའི་རྒྱལ་ཁའི་གྲུབ་འབྲས་ལ་མཉམ་དུ་སྲུང་སྐྱོང་བྱེད་ཀྱི་ཡིན།
གཉིས། གཉིས་ཕན་མཉམ་ལས་ལ་སྐུལ་འདེད་གཏོང་དགོས། ཕྱོགས་གཉིས་ཀྱིས་དཔལ་འབྱོར་ཚོང་དོན་མ་འཇོག་གི་གཞི་ཁྱོན་མུ་མཐུད་ཆེ་རུ་བཏང་ནས་ཀྲུང་གོ་དང་ཐ་ཇིག་སི་ཐན་གྱི་སྲིད་གཞུང་དབར་གྱི་དཔལ་འབྱོར་ཚོང་དོན་མཉམ་ལས་ཨུ་ཡོན་ལྷན་ཁང་སོགས་ལས་སྟེགས་ཀྱི་ནུས་པ་འདོན་དགོས།
གསུམ། མི་ཆོས་རིག་གནས་སྤེལ་རེས་ཟབ་ཏུ་གཏོང་དགོས། ཕྱོགས་གཉིས་ཀྱིས་ཁུང་ཙི་སློབ་གླིང་དང་། ལུའུ་པན་བཟོ་ཁང་། ཀྲུང་ལུགས་གསོ་རིག་ལྟེ་གནས། བདེ་ཐང་མགྱོགས་འཁོར་ལོང་འགོག་ལྟེ་གནས་བཅས་ཀྱི་ནུས་པ་བཏོན་ནས་ཕན་ཚུན་དབར་རིག་གནས་ལྟེ་གནས་འཛུགས་པར་སྐུལ་འདེད་མགྱོགས་སུ་གཏོང་དགོས།
བཞི། བདེ་འཇགས་མཉམ་ལས་ལ་ཤུགས་སྣོན་རྒྱག་དགོས། ཕྱོགས་གཉིས་ཀྱིས་ལག་གདང་སྦྲེལ་ནས་ཉེན་ཁ་དང་འགྲན་སློང་སྣ་ཚོགས་ལ་ཁ་གཏད་བཅག་སྟེ་གོ་ལ་ཧྲིལ་པོའི་བདེ་འཇགས་གྲོས་འགོར་མཉམ་དུ་སྐུལ་འདེད་གཏོང་བའི་མཉམ་ལས་ཀྱི་བསམ་ཤེས་དྲན་ཐོ་དོན་འཁྱོལ་ཡག་པོ་བྱེད་དགོས།
ལྔ། ཕྱོགས་མང་མཉམ་ལས་ཟབ་ཏུ་གཏོང་དགོས། མཉམ་འབྲེལ་རྒྱལ་ཚོགས་སོགས་ཀྱི་ལས་སྟེགས་སུ་ཐ་ཇིག་སི་ཐན་ཕྱོགས་ཀྱིས་ནུས་པ་དེ་བས་ཆེ་བ་འདོན་པར་ཀྲུང་གོ་ཕྱོགས་ཀྱིས་རྒྱབ་སྐྱོར་བྱེད་པ་དང་། ཐ་ཇིག་སི་ཐན་ཕྱོགས་དང་མཉམ་དུ་གོ་ལ་ཧྲིལ་པོའི་གྲོས་འགོ་ཆེན་པོ་བཞི་མཉམ་དུ་ལག་ལེན་བསྟར་འདོད་ཡོད་ལ། ཐ་ཇིག་སི་ཐན་ཕྱོགས་རྒྱལ་སྤྱིའི་འདུམ་འགྲིག་ཁང་དུ་ཞུགས་རྒྱུའི་བློ་ཐག་བཅད་པར་དགའ་བསུ་ཞུ་གི་ཡིན།
